Энэ бүхэн Ерөнхий сайд Л.Оюун-Эрдэнийн хүү О.Тэмүүлэнгийн найз охин Ө.Өгөөмөрийн инстаграм хаягийн сториноос эхэлсэн юм. Хорь гаруйхан настай залуугийн тансаг амьдралын мөнгөний эх үүсвэр хаанаас болох нь хэний ч анхаарлыг татахаар байв. Тиймээс иргэд Л.Оюун-Эрдэнийг орлогоо нотлохоос гадна огцрохыг шаардаж, "Огцрох амархан" жагсаалыг эхлүүлсэн билээ. 

Харин МАН-ын гишүүд Хамтарсан Засгийн газрын гэрээг зөрчсөн намаар АН-ыг тодруулсан бололтой. Чухам тэр нь Засгийн газрыг огцруулахаар энд тэнд гарын үсэг зурсан гишүүдийнх нь гавьяа юм байх.

Иргэдийн шаардлага зөвхөн Ерөнхий сайдыг огцруулах асуудал байгаагүй. Түүнийг бас орлогоо нотол гэж буй.

Гэвч 10 орчим хоног Ерөнхий сайдаас шаардсан ч орлогоо нотолсонгүй. Огцруулах асуудалд л төвлөрсөн шиг "хүч" өөр бусдад нь "саарах" маягтай байгаа нь эхлээд огцрох нөхцөл болов уу гэх асуултад хүргэв.

Одоогоор Ерөнхий сайд Л.Оюун-Эрдэнийг өөрөө огцрох хүсэлтээ өгөхөөр болсон тухай мэдээлэл хөврөөд байна. 

Үүнтэй холбогдуулан Ерөнхий сайдыг огцруулах үйл явцын талаар хүргэж байна. Монгол Улсын Үндсэн хууль, Засгийн газрын тухай хууль, Улсын Их Хурлын тухай хуульд тус тус зааснаар Ерөнхий сайдыг огцруулах гурван зүйл байна. 

• Ерөнхий сайд өөрөө огцрох хүсэлт гаргавал;
• Ерөнхий сайд итгэл хүлээлгэх тогтоолын төслийг УИХ-д оруулбал;
• УИХ-ын гишүүдийн дөрөвний нэгээс доошгүй нь буюу 32 гишүүн Ерөнхий сайдыг огцруулах саналыг УИХ-д гаргасан тохиолдолд Ерөнхий сайдыг огцруулна.

Засгийн газрын тухай хуулийн 22.1-т зааснаар Ерөнхий сайд өөрөө биеийн эрүүл мэндийн байдал, хүндэтгэн үзэх бусад шалтгаанаар бүрэн эрхээ хэрэгжүүлэх боломжгүй болсноос албан тушаалаас чөлөөлж өгөх тухай хүсэлтээ УИХ-д өргөн мэдүүлнэ.

Үндсэн хуулийн дөчин гуравдугаар зүйл /Энэ зүйлийг 2019 оны 11 дүгээр сарын 14-ний өдөр баталсан Монгол Улсын Үндсэн хуульд оруулсан нэмэлт, өөрчлөлтөөр өөрчлөн найруулсан./

1.УИХ-ын гишүүдийн дөрөвний нэгээс доошгүй нь Ерөнхий сайдыг огцруулах саналыг албан ёсоор тавибал Улсын Их Хурал гурав хоногийн дараа хэлэлцэж эхлэн арав хоногийн дотор шийдвэрлэнэ. Улсын Их Хурлын нийт гишүүний олонхи уг саналыг дэмжсэн бол Ерөнхий сайдыг огцруулах тухай Улсын Их Хурлын тогтоол баталсанд тооцож, шинэ Ерөнхий сайдыг гуч хоногийн дотор томилно.

2.Ерөнхий сайд огцорвол Засгийн газар бүрэлдэхүүнээрээ огцорно.

Дөчин дөрөвдүгээр зүйл. /Энэ зүйлийг 2019 оны 11 дүгээр сарын 14-ний өдөр баталсан Монгол Улсын Үндсэн хуульд оруулсан нэмэлт, өөрчлөлтөөр өөрчлөн найруулсан./

1.Ерөнхий сайд улсын төсвийн болон бодлогын тодорхой асуудлаар өөрт нь итгэл хүлээлгэх тогтоолын төслийг оруулбал Улсын Их Хурал гурав хоногийн дараа хэлэлцэж эхлэн арав хоногийн дотор Улсын Их Хурлын нийт гишүүний олонхийн саналаар шийдвэрлэнэ.

2.Улсын Их Хурал тогтоолыг баталсан бол Ерөнхий сайдад итгэл үзүүлж, тухайн асуудлыг дэмжсэнд тооцно. Тогтоолыг батлаагүй бол Ерөнхий сайдыг огцорсонд тооцож, шинэ Ерөнхий сайдыг гуч хоногийн дотор томилно. 

Гуч хоногийн дотор Ерөнхий сайдыг томилж чадахгүй бол УИХ-ыг тараах шийдвэрийг Ерөнхийлөгч гаргана.