Л.Оюун-Эрдэнийн Засгийн газрын отгон байж мэдэх хуралдаан сая эхэллээ. Эндээс гарах улс төрийн хамгийн том шийдвэр бол өөрт нь итгэл үзүүлэх тухай УИХ-ын тогтоолын төслийг өргөн мэдүүлэх эсэх юм. Уг нь МАН-ын VI Бага хурлаас АН-ыг Засгийн газраас гаргах шийдвэр албан ёсоор гарчихсан.

Хэрэв хамтарсан Засгийн газрыг задалбал өөрийн хүсэлтээр огцорно гэдгээ ч Ерөнхий сайд Л.Оюун-Эрдэнэ намын гишүүддээ мэдэгдчихсэн байв. Гэвч үйл явцын өрнөл хэдхэн хоногийн дотор тэс ондоо зүг рүү чиглэчихлээ.

Өөрөө өргөдлөө өгнө гэсэн Л.Оюун-Эрдэнэ үгнээсээ буцаж, улс төрийн итгэл үзүүлэх эсэх тухай УИХ-ын тогтоолын төсөл өргөн мэдүүлэхээр болж байх шиг байна. Мөн Бага хурлын шийдвэр гарсны маргаашаас л Л.Оюун-Эрдэнэ огцорвол 14 мега төсөл зогсоно гэсэн үгийг УИХ-д түүний хөтөлж оруулж ирсэн гишүүд ам уралдан ярих боллоо.

Нөхцөл байдал ийнхүү алга урвуулсан юм шиг өөрчлөгдөж буйд МАН-ын гишүүд ч гайхаш тасраад байгаа юм байна. Ам чангатайгаараа гайхагддаг Ардын намын Бага хурлын гишүүд цахим орчинд ил цагаан байр сууриа илэрхийлээд эхэлсэн байна. Хэрэв Бага хурлаас гарсан улс төрийн шийдвэрийг хэрэгжүүлэхгүй бол Л.Оюун-Эрдэнийг намын даргаас шууд чөлөөлөх асуудлыг босгож ирнэ гэдгийг эхнээсээ мэдэгджээ. Үнэхээр ч Г.Дамдинням гишүүний хэлсэнчлэн “Хамтарсан Засгийн газраас АН-ыг гаргах Бага хурлын тогтоол батлагдсан цагаас мөрдөгдөх ёстой. Манай намын дүрэм, уламжлал хэлбэрдэлтгүй хэрэгжиж ирсэн” гэдэг үнэн. Гэвч МАН-ын дарга Л.Оюун-Эрдэнийн өнгөн дээр олонхийн шийдвэр ямар ч утгагүй болж хувирлаа.

“Огцрох амархан” жагсаал хагас сар үргэлжилж, Бага хурлаас нь Засгийн газрыг нь задлах замаар өөрийг нь огцруулах шийдвэр гарчихаад байхад тэр тэс хөндлөн нүүдэл хийж эхлэв. Бэрхийн хүүгийн энэхүү улс төрийн нүүдэл ямар учиртай вэ? Нийгмийн ч, намын ч дэмжлэггүй болсноо тэр үнэхээр мэдрэхгүй байна гэж үү.

Эсвэл цөөн тооны тойрон хүрээлэгчид нь түүнийг энэ зам руу түлхээд байна уу. Ямар боловч маш утгагүй аргумент гаргаж Л.Оюун-Эрдэнийг авч үлдэх гэж зүтгэж буй нь л үнэн юм. Ерөнхий сайдын оюутан ахуйн найз, одоогийн УИХ-ын гишүүн Э.Болормаа “Ерөнхий сайдыг өргөдлөө өгөөд ороод ирвэл би огцруулахыг зөвшөөрөхгүй” гэж мэдэгдсэнээс харахад энэ бүхэн илхэн байна. Мөн Л.Оюун-Эрдэнийг огцруулбал 14 мега төсөл нуран унана, тиймээс огцруулахгүйгээр энэ төслүүдийг хэрэгжүүлэх ёстой гэсэн байр суурь ч яг үнэндээ парламентын засаглалтай манай улсад ямар ч утгагүй хоосон тайлбар юм. Хэрэв үнэхээр нэгхэн хүнээс хамаардаг мега төсөл юм бол энэ төслүүд угаасаа хэрэгжихгүй гэдэг нь ойлгомжтой. Парламентын засаглалтай, дөрвөн жил тутамд сонгуулиар УИХ-аа шинэчлэн байгуулдаг манай улсад хэн ч энэ төслүүдийг дуустал дангаар засаглах боломжгүй.

Дараа дараагийн Ерөнхий сайд хүссэн ч, эс хүссэн ч сонгуулийн үр дүнд тодроод л явна. Эсвэл энэ 14 мега төслөө хэрэгжиж дуустал Л.Оюун-Эрдэнэ засаглах ёстой гэвэл түүнийг он удаан ХААН залахаас өөр сонголтгүй. Ердөө ганцхан V цахилгаан станц барих гэж Монгол Улс 20 гаруй жил шав тавиад явж байгаагаас үзвэл Л.Оюун-Эрдэнийн зарласан мега төсөл хэрэгжиж дуустал түүнээс удаан хугацаа зарцуулж таарах нь тодорхой юм.

Ер нь бол энэ бүхнээс харахад тойрон хүрээлэгчид нь түүнийг улс төрийн хувьд ийм утгагүй замаар алхуулж эхэллээ. Нам дотроо ч, намын гаднаа ч тэр өдөр ирэх тусам органик дэмжигчдээ алдаж байна. Хоосон пиар, явцгүй тайлбаруудаар аргацаах гэж оролдох тусам Л.Оюун-Эрдэнэд итгэж байсан хүмүүс холдож явж байгаа нь үнэн юм. Хэрэв түүнд УИХ итгэл үзүүлээд Ерөнхий сайдаар нь үлдээлээ ч нийгэмд хүлээн зөвшөөрөгдөх байдлаа тэр энэ хэдхэн хоногт алдаж гүйцлээ. Нийгэм төдийгүй МАН-ын Бага хурлын гишүүд ч түүнийг ил шулуун шүүмжилж байгаа нь үүний илэрхийлэл.

“Ардчилсан намыг Засгаас гаргая гэдэг шийдвэрт Бага хурлаараа хүрээд явсан чинь юун Засагт итгэл үзүүлэх мүзүүлэх болоод явчихав? Бага хурлын шийдвэрээ хэрэгжүүлдэггүй юм бол яах гэж хуралдуулсан юм. Ямар ч дүрэм, зарчим байхгүй зүгээр л хуйвалдаан, нам дамнасан эрх ашгаараа улс орныг удирдах гэсэн юм байхдаа. Сөрөг хүчингүй Ардчилал ч гэж ямар нохойн баас байхав. За Дарангуйлалд тавтай морил гэдэг билүү? Бидний өмнө их зодоон айсуй. Ямар увайгүй юм бэ?” гэхчлэн байр сууриа илэрхийлж буй нь үүний нотолгоо.

С.Ононтуул