Засгийн газрын хуралдаанаар Ерөнхий сайдад итгэл хүлээлгэх тухай УИХ-ын тогтоолын төслийг хэлэлцэн дэмжээд УИХ-д өргөн барихаар тогтсон. Тэгвэл уг асуудлын хүрээнд Засгийн газрын гишүүд болон УИХ-ын гишүүд дараах байр суурийг илэрхийллээ. 

Засгийн газрын гишүүдийн БАЙР СУУРЬ

-Т.Доржханд: Засаглал солих асуудлыг эрс эсэргүүцнэ-

УИХ-ын гишүүн Т.Доржханд "ХҮН намын хувьд Монгол Улсын эрх ашиг чухал. Бид ямар ч тохиолдолд парламентын ардчиллын талд байна. Ямар нэг засаглал солих асуудлыг эрс эсэргүүцнэ" гэв. 

-С.Амарсайхан: Одоо бол Засгийн газар огцрох асуудал огт байхгүй-

Шадар сайд С.Амарсайхан "Засгийн газар огцорно гэдэг бол Үндсэн хуульд зааснаар УИХ, Төрийн эрх дээд байгууллагаар орж, Ерөнхий сайд чөлөөлөгдөх үгүй эсэх асуудал шийдэгдэж, дараа нь Засгийн газар огцрох эсэхийг ярина. Одоо бол Засгийн газар огцрох асуудал огт байхгүй" гэв. 

-Б.Жавхлан: Засгийн газрын цаашдын зорилтыг бүх талаараа дэмжээд ажиллана-

Сангийн сайд Б.Жавхлан "Би Л.Оюун-Эрдэнэ сайдынхаа урьсан Засгийн газарт Ерөнхий сайдтайгаа эцсийн мөч хүртэл хамтарч ажиллаж байна. Би УИХ-ын гишүүн, ард түмний төлөөлөл. Тойргынхоо төлөөлөл. Засгийн газрын өнөөдрийг хүртэл хийсэн зүйл болон цаашдын зорилтыг бүх талаараа дэмжээд ажиллана" гэв. 

УИХ-ын гишүүдийн БАЙР СУУРЬ

-О.Батнайрамдал: Монгол Улсын эрх ашгийг нэгдүгээрт тавиад үргэлжлүүлэх ёстой-

УИХ-ын гишүүн О.Батнайрамдал "Ерөнхий сайдыг түдгэлзүүлэх тогтоол урд нь гарч байгаагүй байх гэж бодож байна. Хамтарсан Засгийн газарт өөр үзэл баримтлалтай намууд хамтарч 10 сар орчим ажиллалаа. 10 сарын хугацаанд 20 жил яваагүй томоохон төслийг урагшлуулж чадсан нь түүхэн амжилт болж үлдэх болов ээ. Тиймээс Монгол Улсын эрх ашгийг нэгдүгээрт тавиад үргэлжлүүлэх хувилбар руугаа явах ёстой. Хувь хүнийхээ хувьд Ерөнхий сайдыг дэмжиж байгаа" гэв. 

-У.Отгонбаяр: Ерөнхий сайдад итгэл үзүүлнэ, үзүүлэхгүй гэж хэлэх боломжгүй-

УИХ-ын гишүүн У.Отгонбаяр "Нууц санал хураалтаар шийдэгдэнэ. Тиймээс итгэл үзүүлнэ, үзүүлэхгүй гэж хэлэх боломжгүй. УИХ дээр Ерөнхий сайд орж ирж маш олон талаас нь ярилцана. Тэгж байж энэ шийдвэр гарна" гэв.