Ерөнхий сайд Л.Оюун-Эрдэнэ шинэ оны босгон дээр үг хэлэхдээ “Эдийн засгийн үзүүлэлтүүд тогтвортой байгаа тул УИХ-ын хаврын чуулганаар татвар, нийгмийн даатгалын багц хуулийн өөрчлөлтийг өргөн барина. Ингэхдээ иргэн, аж ахуйн нэгжүүдийн саналд үндэслэнэ” гэсэн юм. Тэгвэл хаврын чуулганаар өргөн барина гэсэн Татварын багц хуулийн шинэчлэлийг УИХ-д өргөн барихад бэлэн болжээ. Тухайлбал, 2019 онд татварын багц хуульд өөрчлөлт орсноос хойш харьцангуй богино хугацаанд дахин реформын шинжтэй томоохон өөрчлөлтийг оруулахаар боловсуулсан аж. Энэ талаар өчигдөр Сангийн сайд Б.Жавхлан танилцуулж, дараах мэдээллийг өгсөн юм.
Тэрбээр "Татварын багц хуульд нилээдгүй том тогтолцооны шинэчлэл хийхээр зорьж ирсэн. 2019 онд татварын хуульд өөрчлөлт орсон байдаг. Харин энэ удаа дахин өөрчлөлт орох гэж байгаа нь ойрхон өөрчлөлт орж буй явдал.
Хуулийг бэлдэх явцад маш өргөн хүрээтэй хэлэлцүүлэгүүдийг хийсэн. Нийт 14 мянган татвар төлөгчдийг хамруулсан. 500 мянган төгрөг хүртэлх худалдан авалт НӨАТ-аас чөлөөлөгдөнө. Ингэхээр нийт худалдан авалтын 51 хувь нь НӨАТ төлөхгүй гэсэн үг.
Нийт иргэдийн 70 хувь нь НӨАТ-аас 50-100 хувь бүрэн чөлөөлөгдөнө. Мөн иргэдийн сарын цалингийн 800 мянган төгрөг хүртэлх орлогод НӨАТ төлөхгүй. Иргэн, аж ахуйн нэгжийн татварын ачааллыг зохистой хэмжээнд шаталсан хэлбэрээр бууруулах, нөгөө талдаа татварын тогтолцоо, бүртгэл, хамрагдалтыг сайжруулах, бүх нийтээр жигд шударга төлдөг татварын орчин бүрдүүлэх, хариуцлагатай татвар төлөгчдийг дэмжихэд чиглэсэн хуулийн төслийг боловсруулсан" гэсэн юм.
Тэгвэл уншигч та бүхэнд Татварын багц хуульд орж буй онцлох заалтуудыг танилцуулъя.
- Бүх иргэдийн сарын 500 мянган төгрөг хүртэлх худалдан авалтыг 100 хувиар, үүнээс 800 мянган төгрөг хүртэлх худалдан авалтыг 50 хувиар, үүнээс давсан хэсэгт 20 хувиар тус тус НӨАТ-ыг хөнгөлж буцаан олгох
- Хөдөлмөр эрхэлж буй бүх иргэдийн хөдөлмөрийн хөлсний доод хэмжээтэй тэнцэх хэмжээний буюу сарын 800 мянган төгрөг хүртэлх орлогыг 100 хувь хөнгөлж буцаан олгох
- Улаанбаатар хотоос орон нутагт шилжин суух иргэдийн амьдрах таатай орчныг бүрдүүлэх, эрчим хүчний хэмнэлттэй, хүртээмжтэй, ногоон барилгыг нэмэгдүүлэхэд 15 сая төгрөг хүртэлх татварын хөнгөлөлт үзүүлэх
- Аж ахуйн нэгжийн 25 хувиар татвар төлөх босгыг 6 тэрбум төгрөг байсныг 10 тэрбум төгрөг болгон нэмэгдүүлж, 6-10 тэрбум төгрөгийн ашгийн татварыг 15 хувь болгон бууруулах
- Жижиг, дунд аж ахуйн нэгжүүдийг дэмжих хүрээнд 1 хувиар татвар төлөх орлогын босгыг 1.5 тэрбум төгрөг байсныг 2.5 тэрбум төгрөг болгон нэмэгдүүлж, 3 жил хөнгөлөх
- Жилийн үйл ажиллагааны борлуулалтын орлого нь 400 сая төгрөгөөс бага татвар төлөгч нь хялбаршуулсан горимд хамрагдаж, татвар төлөх боломжтой болох, баримтгүй худалдан авалтыг бэлэн бусаар хийсэн тохиолдолд үнийн дүнд НӨАТ шингэсэн гэж үзэж, хасагдах эрхийг нээх
- Татвар төлөгчид татвар, гаалийн байгууллага зөвлөн туслах үйлчилгээ үзүүлж, татвар төлөгчийг дэмжихийн тулд шаталсан сургалтууд зохион байгуулах, 24 цагийн турш ажиллах автомат хариулагч ажиллуулах болон татварын өр төлөх хугацааг уян хатан зохицуулах, хариуцлагатай татвар төлөгчид бодит урамшуулал олгох
Харин татварын багц хууль хэрэгжсэнээр:
- Иргэн, өрхийн орлогыг хамгаалах, хөдөлмөр эрхлэлтийг дэмжих, орон сууцжуулалтыг нэмэгдүүлэхэд чиглэсэн татварын бодлого хэрэгжүүлэх замаар эдийн засгийн өсөлтийг иргэн, өрх бүрд хүртээнэ.
- Бизнес эрхлэгчдэд үүсдэг хүндрэлийг арилгаж, үйл ажиллагаагаа өргөжүүлэхэд дэмжинэ.
- Татвар төлөгчид татвар, гаалийн байгууллага зөвлөн туслах үйлчилгээ үзүүлж, татвар төлөгчийг дэмжих аж.
