УИХ-ын чуулганы нэгдсэн хуралдааны үеэр Ерөнхий сайдад нэр дэвшигч Г.Занданшатар "Авлигатай тэмцэж чадах уу? гэж байна. УИХ парламентын хяналт шалгалтын хуулийг баталж, ард түмний мэдэх эрхийг хангаж, ногоон автобус, нүүрс, Хөгжлийн банк, эмийн чанар гэх мэт олон нээлттэй сонсголыг зохион байгуулж, парламентын хяналт шалгалтын эрх мэдлийг нэмэгдүүлсэн. Иймээс би өөрийгөө үгээрээ биш үйлдлээрээ авлигатай тэмцэж чадсан улстөрч гэж баттай хэлж чадна. Авлигатай тэмцэх үндэсний хөтөлбөрийг баталсан, Авлигалын эсрэг багц хуулийг баталсан, авлигын гэмт хэрэгтэй тэмцэх ялын бодлогыг чангатгасан, ялын дээд хэмжээ оногдуулдаг болсон. Хөрөнгө хураах хууль тэнд бодитой туссан.

Бүгд парламентат ёсны түүхэнд цоо шинэ хуудас нээсэн алхмууд болж, маш олон хулгай луйврын схемүүдийг сонсголоор дамжуулан дэлгэж байсан.

Гэм буруу үйлдсэн эсэхийг зөвхөн шүүх тогтоодог. Энэ бол парламентын буюу ард түмний мөрдөн шалгах хэлбэрийг монголд нутагшуулсан анхны чиг хандлага болсон. Тиймээс би авлига, хулгайтай тэмцэх улс төрийн зориг манлайллыг үгээрээ биш үйлдлээрээ харуулж ирсэн улстөрч.

Мөн татварын реформын талаар тодорхой чиг баримжаатай хүн. НӨАТ-ын буцаан олголтыг нэмэгдүүлж, 5 хувьд хүргэх замаар татварын тэгш төлөгдөх зарчмыг нутагшуулснаар татварын орлого нэмэгдэнэ гэдэгт ч итгэлтэй байгаа. Тансаг хэрэглээ, архи тамхи, өндөр орлогын татварыг бий болгож, ард иргэдийн төлөөд байгаа, долоон буудлын Долгор эмээгийн төлөөд байгаа татварыг бууруулна" гэж дурдлаа. 

М.Жаргал