Монгол Улсын 34 дэх Ерөнхий сайд Г.Занданшатар "шинэ" Засгийн газарт ажиллах сайд нарыг сонгож, Засгийн газрын бүтэц, бүрэлдэхүүнээ зарлах учиртай. Үүнээс улбаалан өнгөрөгч баасан гарагт парламент дахь 30 гаруй гишүүн нэгдэн хуучин сайд нарыг улираан томилохгүй байх шаардлагыг хүргүүлээд байгаа. Энэ талаар УИХ-ын гишүүн Э.Болормаа хэлэхдээ, зарим үндэслэлийг дэмжиж, гарын үсэг зурсан агаад шаардлагыг Ерөнхий сайдад биш МАН-ын Удирдах зөвлөлд хаягласан гэж байв.

Чухамдаа Засаг, засаг дамнаж ажилладаг, монгол төрийн сайдын суудлаас огтхон ч ховхордоггүй зарим түшээдийг буулгах нь нэг талаар зөв ч шийдэл байж магад. Гүйцэтгэх засаглалд хадагдсан юм шиг суусаар, хийсэн ч ажилгүй, гавьсан ч гавьяагүй, салбар нь улам доройтсон сайд нар байж л байгаа. Тэднийг дахин дахин улирааж, өндөр дээд албан тушаалын мануул хийлгэх нь улс оронд ашигтай байсан ч юм уу, үгүй ч юм уу. Нөгөөтэйгүүр Засгийн газар хариуцлагын буух газрыг сайдаас зайлуулж, өөр тийш "бухаж" шилжүүлсэн тохиолдол ч байгаа нь дэгс бус. Зарим нь ард түмэнд халгаатай, амьдралд нь шууд муугаар нөлөөлөхүйц Засгийн газрын шийдвэрээс салбараа ч, иргэдээ ч хамгаалж чадахгүй тэргүүндээ тал засаж, найр тавьж явдаг биш үү. Үнэндээ Гүйцэтгэх засаглалд цогтой, шударга, дайчин сайд байсан билүү, санаанд орж ирэх нь ховор л юм. 

Шинийг хийж үзэж байж шинэчлэлийн зам харгуй тодордог юм бол төрд эрхэлсэн хууччуулыг алгасах зоригийг Ерөнхий сайд Г.Занданшатар гаргаад үзэх л хэрэгтэй. Ерөнхий сайдын томилгоог хэлэлцэх үеэр өөрийнхөө "зоригтой" ажилласныг яриад л байсан шиг ээ, зүтгээд үзэхэд гэмгүй ч юм сан уу. 

Парламент 126 гишүүнтэй болоод одоохондоо нэг их өөрчлөгдсөн зүйл алга л байна. Чуулганы ирц хүрдэггүй өдрүүд байж л байна. Тэгвэл "шинэ" Ерөнхий сайдын "шинэ зам"-ыг харах сонирхол хэнд ч байна. Үүгээрээ Ерөнхий сайдын эрхэнд халдаж байна гэж хэт эмзэглэсний хэрэг юун. Өнгөрснийг үгүйсгэлээ гэж байгаа бол өнгөрсний худал хуурмаг, үнэнтэй эвлэрэх хэрэгтэй биш үү. Эцэст нь Монгол Улс өөрийн гэсэн толгойтой Ерөнхий сайдтай болж чадсан уу гэж л... 

М.Жаргал