Бензиний үнэ нэмэгдэхээр дагаад бараа бүтээгдэхүүний үнэ нэмэгддэг нь зүй тогтол шиг л зүйл. Иргэдийн ахуй амьдралын нэг хэсэг нь машин, мотоцикл гээд техник хэрэгсэл болчхоод байхад нэг л шөнө, нэг л өглөө бензиний үнэ 200 төгрөгөөр нэмэгдчихсэн. Та бүхэн санаж байгаа болов уу, саяхан л нэмэгдсэн шүү дээ. Магадгүй, одоо 2590 төгрөгөөр АИ92-оо аваад явж байгаа биз ээ. Нийслэлд ингэж нэмэгдсэн тул хөдөө орон нутагт бол иргэдийн халаасыг цөлмөж байгаа биз. 

Аж үйлдвэр, эрдэс баялгийн сайдын үүрэг гүйцэтгэгч Ц.Туваан хүртэл ингэж нэмэгдэхийг мэдээгүй, нэмэгдсэн хойно нь ААН-үүдтэй уулзаад, бараг л гуйгаад суусан юм байх. Тэгж нэг юм "АИ92, 95, 98 шатахууны үнийг 100-150 төгрөгөөр буулгаж чадсан. Дизель түлшний үнийг 200 төгрөгөөр буулгаж чадсан. Монополын эсрэг газартай хамтран хяналт шалгалт хийж байна. Үнэ буулгаагүй ШТС-ууд байгаа, ард түмэн хямдаас нь аваад, үйлчлүүлээд явах байх" гэж ярихтайгаа болсон.

Гэтэл өнөөдөр үнэ буулгасан ШТС хаана байна вэ? Иргэдийн сонголт хийж, хямдаар худалдан авах газар хаана байна аа? Үнэндээ одоогийн нөхцөл байдлаас дүгнэхэд, АМГТГ-тайгаа нийлээд иргэдийг хуураад явсан гэж ойлгогдохоор байна. Томоохон хэдхэн ШТС байгаа шүү дээ. Очоод хар л даа. 

Шатахууны үнэ нэмэгдсэн өдрөөс хойш Ц.Туваан хэвлэлд үнэ буурч байгаа гэсэн мэдээлэл өгснөөс өөр юу ч хийсэнгүй. Аж үйлдвэр, эрдэс баялгийн сайдын "онцлох ажил" гэж цахимаар өөрийгөө дөвийлгөхөөс хэтэрсэнгүй.

Тэгээд Засгийн газар огцрох сургаар хийх ёстой ажлаа мартчихсан ч юм уу. Одоо хүртэл сайдын үүрэг гүйцэтгэгч гэдгээ мэдэж байгаа бол шатахууны үнийн асуудлыг зохицуулах гээд явж баймаар сан. Гэтэл дараагийн Засагт найдаад, ажил хүлээлцэх гээд өдөр хоногийг аргацаагаад сууж байгаа юм уу. Засгийн газарт ажиллахад, зүтгэхэд бэлэн Ц.Туваан аа, иргэдийнхээ төлөө зүтгэж харуул. 

М.Гал