Үндэсний их баяр наадам хаяанд ирээд байна. Энэ бол монголчуудын хүсэн хүлээдэг баяр билээ. "Амьд явбал улсын наадам үзнэ" гэдэг ч учиртай. Тэгвэл "Нийслэлийн иргэдийн баяр" гэгч зүйлийг Үндэсний их баяр наадмаас 10 гаруй хоногийн өмнө буюу энэ сарын 28, 29-ны өдрүүдэд зохион байгуулна гэж Хотын дарга маань иргэдээ алмайруулсан. Ингэхдээ Хүрээ цам-даншиг наадамтай хамтатган зохионо гэж буй. Нийслэлийн иргэдийн баяр гэснээ шашинтай хольж хийж байгаа нь заримд бол хачин л санагдана. Уг нь бол аялал жуулчлалын ид улирал руу Хүрээ цамыг татсан нь олзуурхууштай ч хэт өндөр бай шагнал нь шүүмжлэл дагуулах хандлагатай байна. Мөн наадмын бэлтгэлд гарчихсан байгаа бөхчүүдээс ирж барилдах болов уу, гэдэг нь эргэлзээтэй.

Бай шагнал нь бүр ч алмайруулав. Түрүүлж, үзүүрлэсэн бөхийн шагналыг нийлүүлвэл залуу гэр бүлийн хэдэн жил цаг наргүй ажиллаж, хөдөлмөрлөж олоод ипотекийн зээлээр авах "байрны урьдчилгаа" гээд л бодчих. 

Баяр зохиох гэж татвар нэмсэн аятай л 124 саяар байлж байна шүү дээ. Бүр нэг сумын 100 жилээс нижгэр хийх нь. Ийм мөнгөөр бол хэдэн сум ч ойгоо хийчих байх. "Барилдааны түрүү бөх 30 сая төгрөг, үзүүр бөх 20 сая төгрөг гардана. Мөн их шөвгийн хоёр бөх тус тус 10 сая, дунд шөвгийн 4 бөх тус тус 3 сая төгрөг гардах юм. Харин дөрөв давсан найман бөхийг тус бүр 800 мянган төгрөг, гурав давсан 16 бөхийг тус бүр 500 мянган төгрөг, хоёр давсан 32 бөхийг тус тус 200 мянган төгрөг, нэг давсан 64 бөхийг тус бүр 150 мянган төгрөгөөр байлна" гэж байгаа юм л даа. Улмаар зөвхөн "Нийслэлийн иргэдийн баяр"-ын бөхийн барилдааны бай шагнал гэхэд л нийт 124,400,000 мянган төгрөг болж байна.

Хотын дарга Х.Нямбаатар “Нийслэлийн өдрийг 1994 оноос хойш жил бүрийн аравдугаар сарын 29-ний өдөр тэмдэглэж ирсэн. Энэ үеэр хүйтний улирал эхэлчихдэг тул тухайн баярт иргэд өргөн дэлгэр оролцож чаддаггүй. Хотын иргэдийн баярыг зуны дэлгэр цагт тэмдэглэж байх Засгийн газрын шийдвэр гарч, зургаадугаар сарын сүүлийн долоо хоногийн амралтьн өдрүүдэд нийслэл хотын иргэдийн баярыг тэмдэглэхээр болсон. Мөн даншиг наадмыг эл баяртай нэгтгэж энэ жилээс анх удаа зургаадугаар сарын 28, 29-ний өдөр тэмдэглэх шийдвэр гарсан юм.Тус баярыг Хүй долоон худагт зохион байгуулна. Эрийн гурван наадмыг зохион байгуулна.

Бай шагналыг улсын баяр наадмынхаас их байхаар төсөвлөж байгаа" зэргийг дурдаж байсан юм. Тэр амандаа хүрчээ. Энэ баярын үеэр эрийн гурван наадам, бас бус уралдаан тэмцээн болно. Тэгэхээр нийт өртөг хэд байх нь вэ.