Унгар улсын нийслэл Будапешт хотноо гурав дахь удаагаа жүдо бөхийн дэлхийн аварга шалгаруулах тэмцээн болж байна. Өнөөдөр тэмцээний зургаа дахь өдөр. Одоогоор манай улсын жүдоч ОУХМ Б.Ганхайч, К.Ёолк нар хүрэл медаль хүртээд буй. Тэгвэл дэлхий нийтийн анхааралын төв дор болдог томоохон тэмцээнүүдэд спортын сэтгэл зүйч биш, сурвалжлагч биш, бүрэлдэхүүнд багтах учиртай эмч ч биш хүмүүс явах үзэгдэл бүр гаарав. Угтаа монголчууд бол тамирчдадаа хайртай, тэдний хөдөлмөрөөр бахархаж чаддаг, спортод элэгтэй ард түмэн. Олимпоор гэхэд л эмч ч үгүй, манаргасан. Зон олон спортныхныг хүний нутагт эх орныхоо төрийн дууллыг эгшиглүүлж, далбааг мандуулаасай, зорьсондоо хүрээсэй гэж хүсэхийн сацуу бэртэл гэмтэлгүй нутагтаа ирээсэй гэлцдэг шүү дээ. Гэтэл ар хударгаар МҮОХ-оо авч явах ёстой нэгнээ авч явахгүй үлдээдэг нь ёс юм шиг л болоод байна.

Одоо ч гэсэн Шүүхийн ерөнхий зөвлөлийн дарга асан Э.Батбаяр сэтгүүлчийн мандатаар Жүдо бөхийн дэлхийн аварга шалгаруулах тэмцээнийг үзээд явж байна. Дэлхийн аваргын тэмцээнийг сурвалжлах ёстой сэтгүүлчийн мандатыг хэн түүнд ямар шалтгаанаар зүүж өгч эрхлүүлэв? 

Тамирчдыг амжилт гаргаж, ахиж дэвшээсэй, бусад улсын шигшээ багийн адил дутагдаж гачигдах зүйлгүй яваасай, явсан байгаасай гэж дэмжигчид нь бодож суухад ямар ч ач тусгүй нэгнийг мандатаараа аваад явж байхыг үзэх яасан халаглам юм. Шүүхийн ерөнхий зөвлөлийн дарга асан Э.Батбаяр ч яасан дархан эрхтэй юм.

"Ханжоу-2022" Азийн зуны спортын наадмыг хүртэл олддоггүй мандатаар үнэгүй үзээд явж байсан нь саяхан мэт санагдана. МҮОХ хэзээ мандатыг ач холбогдолтой хүнд нь өгдөг болох юм бэ. Мандатыг захиран олгогчид "нүдний гэм" мэт эрхийг зөв хүндээ хэзээ өгдөг болох юм бэ. Ийм увайгүй байдлаар явсаар байвал спортын хөгжил гэж ярихаа ч болих хэрэгтэй. Сэтгүүлчдэд олдоггүй "ховор эрдэнэ"-ийг захын хүн хүзүүндээ зүүгээд Унгарын нийслэлээр явж байна гэж бодоход, хайран. 

А.Сүх