Хуурамч дипломтой хүмүүс төрд ажиллавал тухайн ажилласан хугацааны бүх цалинг нөхөн төлүүлнэ, мөн хуулийн хариуцлага хүлээлгэнэ хэмээн Төрийн албаны зөвлөлөөс мэдэгдээд байгаа. Одоогоор Төрийн албаны зөвлөлөөс хуурамч дипломтой ажилтнуудыг чөлөөлөх ажлыг эрчимтэй хийж байгаа бөгөөд цөөнгүй хүнийг ажлаас нь чөлөөлөөд байна. Харин сүүлийн үед гадаадад төгссөн гэх дипломтой олон хүн төрийн албанд ажилд орж байгаа.

Төрийн албаны зөвлөлөөс дотоодын их дээд сургууль төгссөн хүмүүсийн дипломыг цэгцлээд үргэлжлүүлэн гадаадад төгсөгчдийн дипломыг ч нарийн шалгаж эхлэх юм байна. 

Ганцхан жишээ дурьдахад, Нийслэлийн замын хөгжлийн газрын дарга Б.Одбаяр 2011-2014 онд АНУ-ын Калифорни мужийн Дэйвисийн их сургуульд суралцах хугацаандаа Сакраменто хотын нэгэн компанид давхар ажиллаж байжээ. Мөн магистрын зэргээ ч хамгаалж байхдаа өөр компанид давхар ажиллаж байсан хэмээн намтартаа бичжээ.  Үүнээс харахад үнэхээр суралцаж төгссөн эсэх нь эргэлзээтэй байгаа юм.

Америкт сургууль төгсөгчдийн холбооноос, энэ тухай тодруулахад “Америкийн их дээд сургуульд суралцаж байх үед F1 визний ангиллаар оршин суудаг бөгөөд ийм визтэй тохиолдолд зөвхөн сургуулийн кэмп дотроо номын санч, багшийн туслах, гал тогооны туслах гэх мэт  мэргэжил үл хамаарах олон нийтийн ажилд 7 хоногийн 20 цаг хүртэл ажиллах эрхтэй байдаг. Түүнээс бус бакалаврын зэрэгт суралцаж байх үед өөр компанид ч юм уу өөр хотод бүтэн цагаар ажиллах боломжгүй. Энэ нь сургуулийн виз болон ажиллах виз хоёрыг хоёуланг нь зөрчсөн асуудал болно. Зарим онцгой тохиолдолд дадлагажигч оюутны хөтөлбөрөөр сургуулийн зөвшөөрөлтэйгээр 7 хоног юм уу сарын хугацаатай ч юм уу тодорхой хугацаа заасан хөтөлбөрт мэргэжлээрээ дадлага хийж болох ч энэ нь мэргэжлээрээ ажилласан гэх үндэслэл, бас баримт болдоггүй” гэж тайлбар өглөө. 

Америкт их дээд боловсрол эзэмшинэ гэдэг амар хялбар ажил биш. Тэр тусмаа  оюутан хүүхдийг нарийн мэргэжлийн инженерээр ажиллуулах ямар ч боломжгүй  болохыг Америкт их дээд сургууль төгссөн олон хүн баталж байна. Гэвч Х.Нямбаатарын бродюрын “хамгаалагч” Нийслэлийн замын хөгжлийн газрын дарга Б.Одбаяр өнөөдрийг хүртэл өөрийн төгссөн гэх сургуулийн дипломыг олон нийтэд баталж үзүүлэхгүй байгаа нь хачирхалтай.