УИХ-ын чуулганы үеэр УИХ-ын гишүүн Х.Тэмүүжин дараах үгийг хэллээ.

Тэрбээр "Үндсэн хууль батлагдаад 33 жил, 2008 оны 7-р сарын 1-ний эмгэнэлт үйл явдал болоод 17 жил болж байна. Гэтэл 17 жил иргэнийхээ эрхийн төлөө хууль маш бага гаргасан. Харин дарга, төрийг эрх мэдэлтэй болгох хууль маш ихээр үйлдвэрлэсэн. Сая УИХ стратеги төлөвлөгөөгөө баталсан. Хүний эрхийг дээдэлсэн, хүн төвтэй хууль зүйн бодлогын төлөө 126 гишүүн ажиллана гэж хэлсэн. Хууль зүйн байнгын хороонд эрхлэх асуудал олон бий. Гэтэл эрхлэх асуудлаараа хяналт тавьж чаддаггүй байнгын хороо яаж шийдвэр гаргаж, асуудлыг яаж бодитой дүгнэх вэ? Бид иргэнд зориулсан хуулийн шинэтгэл хийж чадахгүй байгаа учраас гудамжинд иргэд айдастай явж байгаа. Улстөрчид өөрсдөө хонгил ярьж байгаа юм. Өөр хоорондоо утсаар ярихдаа "сонсоод байна" гээд, дарга нарыг дуудахдаа 1,2,3 гээд бүр хочоор нь ярьж байгаа.
-Яг Зүүн Германы нууц цагдаа шиг хувийн мэдээллээ хуулийн байгууллагуудад шүүхийн зөвшөөрөлгүй алддаг, тэнд хууль биелэж байгаа эсэхийг мэддэггүй, иргэний эрх чөлөө хаана эвдэгдээд байгаа талаар ямар ч ойлголт байхгүй. Гэтэл иргэд нь гудамжинд хүнд хутгалуулж байдаг, зодуулж байдаг, эрүү шүүлтэд өртөж байдаг.
Иргэний хамгийн чухал, үндсэн эрхүүдийн нэг бол эрүү шүүлтээс ангид байх, энэ эрхийг онц байдал зарласан үед ч үл хүндэтгэж болно гэсэн Үндсэн хуультай мөртлөө жил болгон эрүү шүүлтэд өртсөн тухай, эрүүгийн гэмт хэрэгтэй тэмцэх ёстой байгууллагууд нь иргэнийхээ эсрэг хийдэг болчихсон тухай сонсоод сууж байгаа. Тэгсэн мөртлөө үүний араас явдаг чиг үүрэг бүхий Тусгай хяналтын дэд хороо байхгүй. Хууль зүйн байнгын хороо нь яг шүдгүй арслан шиг, гар хөл нь хүлэгдчихсэн. Үүнийг шийдэж байж УИХ асуудлаа мэддэг болно" гэв.

М.Гал