Засгийн газар Монгол Улсын 2026 оны төсвийн төсөл болон холбогдох хуулийн төслүүдийг боловсруулж, есдүгээр сарын 1-ний өдөр УИХ-д өргөн мэдүүлсэн билээ. 

Монгол Улсын 2026 оны нэгдсэн төсвийн тэнцвэржүүлсэн орлогыг 31.6 их наяд төгрөг, нэгдсэн төсвийн нийт зарлага 32 их наяд 980 тэрбум төгрөг, төсвийн тэнцэл ДНБ-ий 1.3 хувийн алдагдалтай байхаар төлөвлөсөн байна. 

Нийгмийн даатгалын сангаас олгох бүх төрлийн тэтгэвэр, Нийгмийн халамжийн сангаас олгох тэтгэврийн хэмжээг 6.0 хувиар нэмэгдүүлэхээр тооцож, нийт 378 тэрбум төгрөг нэмж хуваарилна гэж Төсвийн төсөлд тусгасан байна. 

Шинэ хоршоо-чинээлэг малчин хөдөлгөөнд 500.0 тэрбум төгрөгийн хөнгөлөлттэй зээлийг олгохоор төлөвлөжээ

Монгол Улсын Засгийн газрын 2024 оны 166 дугаар тогтоолоор баталсан “Шинэ хоршоо-Чинээлэг малчин” үндэсний хөдөлгөөний хүрээнд хоршооны гишүүн малчдад зориулж 50.0 сая хүртэл төгрөгийн зээлийг олгож, нийт зээлийн хүүгийн 12 нэгж хувийг төрөөс хариуцан төлж байна. Тус хөдөлгөөний хүрээнд 2024-2025 онд нийт 26,759 хоршооны гишүүн малчинд 841.9 тэрбум төгрөгийн зээлийг олгож, зээлийн үлдэгдэл 2025 оны 07 дугаар сарын 31-ний өдрийн байдлаар 714.8 тэрбум төгрөг байгаа аж.

2026 онд шинээр 500.0 тэрбум төгрөгийн хөнгөлөлттэй зээлийг олгохоор төлөвлөж, зээлийн хүүгийн дэмжлэгт 108.9 тэрбум төгрөгийг төрөөс хариуцан төлөхөөр төсвийн төсөлд тусгажээ.