Нийтийн өргөдөл гомдлын системд хуульч О.Батхүү "Үл хөдлөх хөрөнгө борлуулахад төлдөг 2 хувийн татварыг хүчингүй болгох" өргөдлийг санаачилсан агаад тус өргөдлийг 100 мянга гаруй иргэн дэмжжээ.
Саналыг 100,000 ба түүнээс дээш тооны иргэн дэмжсэн бол Улсын Их Хурлын дарга уг асуудлаар Улсын Их Хурлын чуулганы нэгдсэн хуралдаанд мэдээлж, харъяалах Байнгын хороонд шилжүүлэхзохицуулалттай.
Тодруулбал, УИХ-аас ардчилсан, ил тод, цахим, зөвлөлдөх парламентыг бий болгох зорилгоор D-Parliament платформыг 2022 онд нээсэн. Энэхүү платформыг өргөжүүлэх ажлын хүрээнд Улсын Их Хурлын бүрэн эрхэд хамаарах тодорхой асуудлыг шийдвэрлүүлэх иргэний саналыг хүлээн авах D-Өргөдөл буюу “Нийтийн цахим өргөдөл, гомдлын систем”-ийг хөгжүүлээд байгаа юм. Тус системээр дамжуулан иргэн нийтийн өргөдөл санаачлах болон нийтийн өргөдлийг дэмжиж санал өгөх боломжтой болсон билээ.
Тэгвэл нийгэмд хүлээлт үүсгээд байсан өргөдлийг санаачлагч Хуульч О.Батхүү дараах тайлбарыг өөрийг цахим хуудаст нийтэлжээ.
Тэрбээр "Юу болоод өнгөрсөн цаашид яах талаар товч мэдээлэл хүргье ээ.
Байр, орон сууцаа худалдан борлуулахад төлдөг 2 хувийн татварыг хүчингүй болгох олон нийтийн өргөдөл санаачилсан. Өргөдөл маань 30 хоногийн дотор 100 мянган санал авах ёстой байсан ч 20 хоногт энэ өндөр босгыг давж чадлаа.
Хүн бүхэнд хамаатай асуудал байсан учир бүгд л зүтгэлээ. ТВ хэвлэл мэдээллийн хэрэгслүүд яриа сайн авлаа, хамгийн өндөр үзэлттэй нэвтрүүлгүүдээр орлоо. Олон мянган дагагчтай инфлүсерүүд маань уриалж түгээлээ. Хамгийн гол нь шудрага бус татварыг эсэргүүцэгч иргэд галын шугамын эхэнд явж гарын үсэг зурууллаа. Бүгдэнд нь баярлалаа, бүгдээрээ чадлаа!
Цаашид юу болох вэ? Намрын чуулган 9 сарын 15-нд эхлэнэ. Үүнээс 7 хоногийн дотор холбогдох Байнгын хороо хэлэлцээд 3 сарын дотор хуулийн төсөл боловсруулахыг Засгийн газарт чиглэл болгох юм. Ингээд УИХ-р хэлэлцэж батлагдвал хууль болно гэсэн үг. 2026 оны 1 сараас хэрэгжиж эхлэх болов уу? Гэхдээ энэ цэвэр УИХ-ын бүрэн эрхэнд хамаарна гэдгийг хэлэх нь зүйтэй.
Одоо зүгээр суухгүй. Гишүүдтэй тулж ажиллана. Учир нь бүх нам эвсэл "татвар бууруулах" амлалт өгсөн. Гишүүд ч тэгж ярьж сонгогдсон. Тиймээс БИДЭНД ЭНЭ ХУУЛИЙГ БАТЛАХЫГ ШААРДАХ ЭРХ БИЙ.
Өргөдөл санаачлагчийн хувиар надад дахиад 3 сарын ажил үлдэж байна. Ажлын явц байдлын талаар тухай бүр мэдээлэл хүргээд явна. Эхэлсэн ажлаа дуусгаж үр дүнгээ харна гэдэгт итгэлтэй байна" гэжээ.
