Засгийн газар Монгол Улсын 2026 оны төсвийн төсөл болон холбогдох хуулийн төслүүдийг боловсруулж, есдүгээр сарын 1-ний өдөр УИХ-д өргөн мэдүүлээд буй.

2026 оны төсвийн төсөлд тусгаснаар засаглалын шинэчлэлийг эрчимжүүлж, олон нийтийн хяналттай, цомхон, чадварлаг төрийн албыг бүрдүүлэх аж. Түүнчлэн дараах арга хэмжээг авч хэрэгжүүлэхээр төлөвлөжээ. 

• Чиг үүргийн давхардлыг арилган, төрийн албыг цомхон чадварлаг болгож хэмнэлт хийнэ.
• Төрийн болон төрийн өмчийн оролцоотой хуулийн этгээдийн хувьцааг олон нийтэд санал болгож, бүтцийн өөрчлөлт хийнэ.
• Төрийн өмчит болон төрийн өмчийн оролцоотой хуулийн этгээдийг нэгтгэх, татан буулгах, бүтэц, орон тоо, түүний цалин хөлсний бодлогыг оновчтой тогтоож, удирдлагын багийг улс төрөөс ангид, нээлттэй сонгон шалгаруулалт зохион байгуулан томилно.
• Шүүхийн хараат бус байдлыг хангаж, хариуцлагатай, иргэн төвтэй шүүх тогтолцоо бүрдүүлэх хүрээнд Гэр бүл, хүүхдийн хэргийн шүүх, Хялбар ажиллагааны шүүхүүд байгуулна.

Харин Эрүүл мэндийн салбарт дараах зүйлсийг хийхээр төлөвлөсөн байна. Тухайлбал, Эрүүл мэндийн даатгалын сангийн нөөцийг өвчлөл, нас баралтын тэргүүлэх шалтгаан болж буй өвчин эмгэг, амь тэнссэн үеийн тусламж үйлчилгээнд түлхүү зарцуулж, хүлээж болохуйц, амьдралын чанар сайжруулах тусламж, үйлчилгээнд иргэний хариуцан төлөх хамтын төлбөрийн хэмжээг нэмэгдүүлэх замаар шатлал хоорондын урсгалыг зохицуулж, санхүүжилтийн үр ашгийг нэмэгдүүлнэ.
- Эрүүл мэндийн салбарт улсын төсвийн хөрөнгө оруулалтаар 211.6 тэрбум төгрөг, гадаадын зээл тусламжаар 1,089.5 тэрбум төгрөг буюу нийт 1.3 их наяд төгрөгийн санхүүжилт хийгдэнэ. Тус хөрөнгө оруулалтаар салбарын тулгамдсан асуудлыг шийдвэрлэх буюу Хавдрын эмнэлэг, Эс эд эрхтэн шилжүүлэх суулгах эмнэлэг, Зүрх судасны эмнэлгийн бүтээн байгуулалтыг эхлүүлэх бөгөөд гадаад зээлийн хөрөнгөөр 17 аймгийн эмнэлгийн барилгыг шинэчлэх, эрчимт эмчилгээ болон яаралтай тусламжийг сайжруулж, нэн шаардлагатай тоног төхөөрөмжийг санхүүжүүлнэ.