Маргааш буюу есдүгээр сарын 15-ны өдөр “Олон Улсын ардчиллын өдөр” тохиож буй. Үүнтэй холбогдуулан Ардчилсан намаас Конрад-Аденауэр сантай хамтран ардчиллын үнэт зүйлсийг бататгах, бэхжүүлэх, Монголын ардчиллын 35 жилийн олон амжилтаа цэгнэж, ирээдүйн зорилгоо хэлэлцэхээр Их Монгол Улсын голомт болох Хэнтий аймагт чуулж байна.
Энэхүү арга хэмжээнд УИХ-ын гишүүн, Ардчилсан намын дарга, УИХ дахь Ардчилсан намын бүлгийн дарга О.Цогтгэрэл, УИХ-ын дэд дарга Б.Пүрэвдорж, Ардчилсан намын Ерөнхий нарийн бичгийн дарга Н.Ганибал тэргүүтэй Ардчилсан намаас парламентад сонгогдсон гишүүд болон Конрад-Аденауэр сангийн Монгол дахь суурин төлөөлөгч Виктор Франк тэргүүтэй зочид төлөөлөгчид оролцож байна.
Арга хэмжээний эхэнд Ардчилсан намын хөтөлбөр, үзэл баримтлалын талаар Намын дарга О.Цогтгэрэл улс төрийн илтгэл тавих бол Конрад-Аденауэр сангийн Монгол дахь суурин төлөөлөгч Виктор Франк “Баруун төвийн бодлого чухал болох нь” сэдэвт илтгэл тавих юм. Мөн тус арга хэмжээнд Хэнтий, Сүхбаатар, Дорнод аймгийн Ардчилсан намын дарга нар оролцож, гишүүдийн дунд хэлэлцүүлэг өрнүүлэх юм.
Энэхүү арга хэмжээ нь Монголын ардчиллын үнэт зүйл, үзэл санааг сурталчлах, олон нийтийн улс төрийн оролцоог нэмэгдүүлэх зэрэг өндөр ач холбогдолтой.
Ташрамд дурдахад, НҮБ-ын Ерөнхий Ассамблейгаас жил бүрийн есдүгээр сарын 15-ны өдөр “Олон улсын ардчиллын өдөр” байхаар 2007 онд тогтож, 2008 оноос дэлхий нийтээр тэмдэглэж байна.
