Paramount Skydance компани Warner Bros. Discovery-г худалдан авах 110 тэрбум ам.долларын хэлцлээ түр хугацаагаар хойшлуулж, нэгдэн нийлэх үйл явцыг ирэх онд хүртэл зогсоохоор болжээ. Хоёр компани уг хэлцлийг 2027 оны зургадугаар сарын 1 хүртэл, эсвэл шүүхийн шийдвэр гарах хүртэл хойшлуулахаар тохиролцсон байна. Энэ шийдвэр нь АНУ-ын 12 муж уг нэгдлийг өрсөлдөөний эсрэг гэж үзэн шүүхэд нэхэмжлэл гаргасантай холбоотой юм.
Калифорни тэргүүтэй мужуудын прокурорууд Paramount болон Warner Bros. Discovery нэгдсэнээр кино, телевизийн салбарт хэт их зах зээлийн хүч төвлөрч, өрсөлдөөн буурна гэж үзэж байна. Тэдний үзэж буйгаар ийм томоохон нэгдэл нь хэрэглэгчдэд хүрэх контентын үнэ өсөх, сонголт багасах эрсдэлтэй.
Шүүхийн маргаан долдугаар сарын 13-нд эхэлсэн бөгөөд АНУ-ын холбооны шүүх хэлцлийг түр хугацаанд зогсоох арга хэмжээ авчээ. Үүний улмаас өмнө нь товлогдсон урьдчилсан шүүх хурлыг цуцалж, илүү өргөн хүрээтэй монополийн эсрэг хэрэг хянан шийдвэрлэх ажиллагаа эхлэх төлөвтэй байна. Paramount Skydance хэлцэл эцэслэн дуусах хүртэл Warner Bros. Discovery-д өдөр бүр 7 сая ам.долларын төлбөр төлөхөөр тохиролцсон бөгөөд хэлцэл есдүгээр сарын 30 гэхэд дуусахгүй бол энэ төлбөр нийтдээ 1.7 тэрбум ам.долларт хүрч болзошгүй байна.
Уг худалдан авалт амжилттай бол Paramount Skydance кино үйлдвэрлэлийн томоохон студиудын нэг болох Warner Bros., HBO болон бусад олон телевизийн суваг, стримингийн үйлчилгээг өөрийн бүрэлдэхүүнд оруулах юм. Мөн Warner Bros. Discovery-ийн эзэмшдэг CNN ч шинэ нэгдсэн компанийн бүрэлдэхүүнд багтах учир хэвлэл мэдээллийн салбарын бүтэц, өрсөлдөөний талаарх маргааны гол төвд ороод байна.
Paramount Skydance-ийн гүйцэтгэх захирал Дэвид Эллисон уг хэлцлээр дамжуулан Netflix, Disney зэрэг аварга компаниудтай өрсөлдөх хэмжээний хүчирхэг медиа корпораци байгуулахыг зорьж байгаа. Гэвч шүүхийн маргаан болон зохицуулагч байгууллагуудын шалгалт хэлцлийн ирээдүйг тодорхойгүй болгожээ. Хэрэв шүүх нэгдлийг хоригловол Paramount Skydance их хэмжээний санхүүгийн алдагдал хүлээх эрсдэлтэй. Харин хэлцэл зөвшөөрөгдвөл энэ нь Холливудын түүхэн дэх хамгийн том медиа нэгдлүүдийн нэг болох юм.Ийнхүү кино, телевиз, стриминг болон мэдээний салбарын хоёр том тоглогчийг нэгтгэхээр төлөвлөсөн 110 тэрбум ам.долларын хэлцэл одоогоор шүүхийн шийдвэрийг хүлээж байна.
Л.Баяр
