Уржигдар шөнө орсон борооны улмаас Сүхбаатар дүүргийн 13 дугаар хорооны айлуудын 80 хувь нь усанд автжээ. Бүхэл бүтэн нэг хорооны айл өрх тэр чигээрээ усанд автсан шалтгаан нь ердөө 20 хоногийн өмнө барьсан “цоо шинэ” үерийн ус зайлуулах хоолой, далан нь эвдэрсэнтэй холбоотой.

Бүхэл бүтэн нэг хорооны айл өрх тэр чигээрээ усанд автсан шалтгаан нь ердөө 20 хоногийн өмнө барьсан “цоо шинэ” үерийн ус зайлуулах хоолой, далан нь эвдэрсэнтэй холбоотой.

11 сая төгрөгөөр барьсан үерийн ус зайлуулах хоолой нь 10 минутын турш орсон борооны ая даахгүй байна нурчихна гэж уг ажлыг гүйцэтгэсэн компани, хүлээгээд авчихсан мэргэжлийн хяналтын байгууллагынханы хэн нь ч төсөөлөөгүй биз. Үр дүнд нь Сүхбаатар дүүргийн 13 дугаар хорооны иргэд хонох газаргүй болж эд хөрөнгө, сэтгэл санаагаараа хохироод байна.

         Тус хорооны айлууд өчигдөр өдөржин гэр рүү гээ орсон усаа хувингаар зөөж өнжсөн байна. Үргэлжлэн бороо орж буй тул усанд автсан гэртээ хонох боломжгүй болж толгой хоргодох газар хайж байгаагаа тус хорооны иргэд хэлж байлаа.

         Зарим айлын жорлон руу борооны ус орж бохир нь халсан гэнэ. Тиймээс бохир соруулах машин дуудсанаас гадна өөрсдөө орчноо цэвэрлэх гэж хүндхэн ажилтай тулгарсан байна.  Зарим айлын хашаа нурж, заримынх нь тэр чигтээ усанд автсанаас болж цахилгааны утас нь тасарч тог, цахилгаангүй болжээ. Муу дээр муухай гэгчээр хуурай гэх зүйлгүй гэртээ бохиртойгоо холилдсоны дээр тог цахилгаангүй болсон нь иргэдийг бүр л хүнд байдалд оруулжээ. Энэ бүхэнд үерийн ус зайлуулах хоолой барьсан компани хариуцлага хүлээх ёстой гэж олон нийт үзэж байна. Ширүүн бороо үргэлжилж бороо орвол тус хорооны айлууд гэртэйгээ урсах нөхцөл байдалтай тул яаралтай арга хэмжээ авч, далан болон үерийн ус зайлуулах хоолой барьсан компанид хариуцлага тооцох хэрэгтэй гэдгийг иргэд хэлж, бухимдаж байна. Ядаж л  нүд хуурч тавьсан далан, ус зайлуулах хоолойг нь дахин сайн засч, янзлуулмаар байна гэлээ.

Ер нь нийслэлд ширүүн бороо орох бүрт элдэв сөрөг асуудал гардаг боллоо. Хэдэн тэрбумын өртөг зардал гарган байж засч, сайжруулсан зам нь эвдрэхээс эхлээд олон айл өрх үерт автах харамсалтай үйл явдал жил бүрийн зун гардаг болсоны ганц жишээ нь энэ юм. Ядаж л замыг барихдаа ус зайлуулах хоолойг давхар тавиагүйгээс болж усархаг бороо орсоны улмаас нийслэлчүүд явах замгүй болж байна. Их устай гудмаар тохь, тухаа алдан ажил, гэртээ хүрч байна. Машин зам бүхэлдээ усанд автаж замын хөдөлгөөнд ч төвөг учирдаг болов.  

Төр болон зарим хувийн хэвшлийн хариуцлагагүй, хэнэггүй байдлаас болж жил бүрийн зунаар олон айл үерт автаж байна. Тавьсан зам, барьсан далан нь ганц ширүүн борооны ая даахгүй ард иргэдийн аюулгүй байдалд хүндрэл учруулж байгаа.

Манайхан хэзээ ажлаа хийсэн шиг хийдэг болох вэ? Ажил гүйцэтгэж буй нь ч тэр хүлээж авч байгаа мэргэжлийн хяналтынхан ч тэр хаа, хаанаа хариуцлагатай байхгүй бол энэ мэтээр иргэд хохирсоор байх нь.

24tsag.mn