Эрүүл мэндийн байгууллагад сайн суралцаж, өндөр боловсрол эзэмшсэн, чадварлаг эмч, ажилчид байдаг боловч бид эмнэлгийн үйлчилгээний талаар ойлголт багатай. Эмнэлгийн тусламж үйлчилгээний чанар гэдэг бол сайн технологи, чадварлаг эмч, мэргэжилтэн гэхээсээ илүү үйлчилгээ, үйлчилгээг сайжруулах тухай асуудал байдаг.

Чанартай үйлчилгээнд нөлөөлөх хүчин зүйлүүд гэсэн судалгаанд өвчтөнд анхаарал хандуулах, анхны тусламж үзүүлэх, чадварлаг мэргэжилтэнтэй байх гэсэн асуудлууд эхний байруудыг эзэлж байсан бол орчин үеийн сайн технологитой байх нь 7-р байранд эрэмбэлэгдсэн байна.
Бид үйлчилгээнд гарч болох алдаа дутагдлын талаар менежмент хийхээс өмнө эмнэлгийн төрөлхийн шинж төрхийг таньж мэдэх хэрэгтэй. Эмнэлгийн төрөлхийн шинж төрхийг “Засварын газар”, “Шорон”, “Зочид буудал” шиг гэж тодорхойлсон байдаг. Яагаад ийм төрөлхийн шинжүүдтэй гэж. Энэхүү мэдээллийг International Hospital Federation олон улсын байгууллагын албан ёсны сэтгүүл болох World Hospitals and Health Services сэтгүүлээс иш татаж хүргэж байна.

Засварын газар

Эмнэлгийн тусламж үйлчилгээ үзүүлснээр өвчтөний эмгэг өөрчлөлтийг “засварлах” үйл ажиллагаа явуулдаг гэж ойлгож болно. Эмнэлэгт үйлчлүүлэгчийн хэрэгцээ, шаардлагыг таамаглах, өвчтөний өдийг хүртэл явсан туршлага, өвчний түүхийг анхаарахаасаа илүү эмч, ажилчид маань би ажлаа л хийж байна, асуудлыг чинь шийдвэрлэж байна гэсэн байдлаар ханддаг тухай дурджээ.

Шорон

Өвчтөн бол ердийн үйлчлүүлэгч биш юм. Тэд бусдад болон өөртөө аюултай байдал үүсгэдэг гэдгээрээ “шорон” шиг төрөлхийн шинжийг агуулсан байдаг. Өвчтөн сэтгэл санааны хувьд сул дорой байдалтай, халдвар тараах эрсдэлтэй. Мөн тэд тусгаарлагдсан, хөдөлгөөн нь хязгаарлагдсан буюу хэвтрийн дэглэм барьсан, эргэлтийн тодорхой цагтай, эмнэлгийн дүрэм, журам дагаж мөрдөх шаардлагатай, ижил хувцас, тус бүрийн өрөө, нийтийн хоолтой зэрэг олон шинжүүдээрээ “шорон”-той ижил төстэй байдаг. Тийм ч учраас эмнэлэг уян хатан биш, ил тод нээлттэй биш, эелдэг биш байдалтай байдаг нь энэхүү төрөлхийн шинжтэй нь холбоотой юм.

Зочид буудал

Зочид буудлыг санагдуулам. Яг л зочид буудалд бүртгүүлэх, буудлаас гарах, үйлчлүүлэгчийг хүлээн авах зэрэгтэй адил эмнэлгийн эрэмбэлэн ялгах хэсэг, эмнэлэгт хэвтэх, эмнэлгээс гарах, өрөөний цэвэрлэгээ, үйлчилгээ зэрэг зэрэг олон шинжийг агуулдаг. Үйлчлүүлэгч голдуу яг ийм “зочид буудал” шиг үйлчилгээний хэсгээс л сэтгэл ханамж авдаг, тусламж үйлчилгээнийхээ чанарыг үүгээр л үнэлдэг. Ард иргэдэд анагаах ухааны талаар нарийн мэдлэг байхгүй учир эмнэлгийн технологи, эмчилгээний чанарыг үнэн зөвөөр, бодит байдлаар үнэлэх нь хэцүү байдаг. Тиймээс үйлчилгээний хэсэгт л, харилцаа, ханлагад л анхаарал хандуулах хэрэгтэй.

Дэд хурандаа Л.Баттөр, АУ-ны доктор, дэд профессор