“Улсаа аврах ард түмний хөдөлгөөн”-өөс УИХ-ын ээлжит бус чуулганыг хуралдуулахыг шаардаж мэдээлэл хийлээ.
Тус хөдөлгөөний зүгээс ЖДҮХС-аас зээл авсан гишүүдийн бүрэн эрхийг түдгэлзүүлэх ёстой гэж үзэж байгаа аж. Энэ талаар тус хөдөлгөөний Улаанбаатар хот дахь зохицуулагч Б.Жагар “Ард түмний итгэлд найдвараар тоглож, улс төр хийж, улс төрийн албан тушаалд өгсөх санаархлыг зохион байгуулалттайгаар гаргаж ирж байгаад харамсаж байна. ЖДҮ эсвэл 60 тэрбум төгрөгийн хэргийн эсрэг Сүхбаатарын талбайд болсон тэмцлээс хэн хожсон гэхээр тодорхой нэр бүхий хүмүүс л албан тушаалд очсон. Албан тушаал авахгүй гэсэн хүмүүс нь албан тушаалд очлоо. Эцсийн бүлэгт ард түмэн өр зээлтэйгээ үлдлээ. ЖДҮ, 60 тэрбумын хэргийн эсрэг тэмцэл үнэхээр бодит тэмцэл байсан бол хамтарч тэмцье.
Мөн сонгогчдынхоо өмнө хүлээсэн үүргээ биелүүлж чадахгүй байгаа УИХ эрх зүйн чадамжгүй байна. Үүнийгээ ч олон байдлаар баталлаа. Ард түмний өмнө тулгамдсан асуудлын нэг бол нэгдүгээрт, утааны асуудал. Хүн бүр эрүүл мэндээрээ хохирч байна. Түүнчлэн ажиллах орчин нөхцөл тааруу, ажлын байр хомс, иргэд нь өр зээлэнд дарагдсан, ямар ч ирээдүй харагдахгүй байхад УИХ зөвхөн өөрсдийнхөө хийсэн хулгайн асуудлыг хэлэлцэж, 2020 оны сонгуулиас өмнө үйлдсэн гэмт хэргээ яаж сэгсрэх вэ, яаж нэгэн рүүгээ чихэх вэ гэх хуулийн төслүүдийг боловсруулж байна. Ингэж бие биеэ өршөөх, хамгаалах тогтолцоо руу орчихлоо. Энгийн иргэд шоронд орж болдог. Дарга нар шоронд орохоороо бие нь өвдөөд, даралт нь ихсээд, сахар нь хөдлөөд гараад ирдэг. Ингэж Монголын хуулиар тоглож болохгүй. Улсын Ерөнхий прокурор М.Энх-Амгалан хулгай хийсэн гишүүдийг оруулж ирэх хэрэгтэй. Жирийн олон иргэдэд 500 мянган төгрөгийн ч зээл олдохгүй байна. Гэтэл гишүүдийн ах дүү, хамаатан саднуудад тэрбумаар нь олгодог нь санхүүгийн гэмт хэрэг” гэлээ.
Б.Лхам
Сэтгэгдэл (9)