Жил бүрийн хоёрдугаар сарын 15-ны дотор төрийн албан хаагчид хөрөнгө оруулгын мэдүүлгээ мэдүүлэх үүргийн хугацаа өнөөдрөөр дуусч байна. Өнгөрсөн онд 40073 төрийн албан хаагч ХОМ-ээ мэдүүлснээс Сонгуулийн ерөнхий хорооны гишүүн Б.Билэгт мэдүүлгээ өгөөгүй бол дөрвөн төрийн албан хаагч мэдүүлгээ хоцроожээ. Хуулийн хугацаа өнөөдрөөр дуусч байгаатай холбогдуулан АТГ-аас дараах зүйлийг тодрууллаа.

-Энэ жил 40800 хүн ХОМ-гээ мэдүүлэх ёстой. Одоогоор явц хэр байна, хэдэн хүн хөрөнгө оруулгын мэдүүлгээ мэдүүлээд байна вэ?

-Улсын хэмжээнд 40800 орчим албан тушаалтан хөрөнгө, орлогоо мэдэүүлэх ёстойгоос 98 хувь нь мэдүүлгээ өгсөн. Мөн ХОМ-гээ мэдүүлэх ёстой төрийн өндөр болон түүнтэй адилтгах 280 албан тушаалтан байгаагаас өнөөдрийн 10.00 цагийн байдлаар 12 нь мэдүүлгээ өгөөгүй байна.

-УИХ-ын гишүүдээс хэчнээн гишүүн ХОМ-гээ мэдүүлсэн байгаа вэ?

-УИХ-ын гишүүнээс тэд нь мэдүүлсэн, мэдүүлээгүй гэж хэлэх боломжгүй байна. Учир нь одоогоор бүртгэж байна,. Системд нэгдсэн байдлаар орохоор энэ талаарх мэдээллийг өгөх боломжтой.

-Хөрөнгө оруулгын мэдүүлгээ мэдүүлээгүй тохиолдолд хуулийн ямар үүрэг хүлээх вэ?

-Хуулийн хугацаанд ХОМ-ээ гаргаж өгөөгүй тохиолдолд хүндэтгэн үзэх шалтгаантай бол сануулдаг. Харин удаа дараа хожимдуулсан бол цалингийн хэмжээг гурван сар хүртэл хугацаагаар 30 хувиар бууруулах, худал мэдүүлсэн бол албан тушаалыг нь бууруулах, мэдүүлгийг гаргаж өгөөгүй бол нийтийн албанаас халах хүртэл хариуцлага тооцох заалттай байдаг.

-ХОМ мэдүүлэх ёстой хүмүүс хуулийн хугацаандаа 100 хувь мэдүүлдэг үү?

-Хоёрдугаар сарын 15-ны өдөр мэдүүлнэ гэсэн хуулийн заалттай. Өнгөрсөн жил хуульд заасан хугацаанд мэдүүлээгүй хоёр хүн байсан. Гэхдээ төрийн албан хаагчид хуулийн хугацаанд ХОМ-гээ өгөөд хэвшчихсэн.

                                                                                                Р.Хишигжаргал