Энэ сарын 13-ны өдөр Улсын Дээд шүүхийн шүүгч Ч.Хосбаяр, Ц.Амарсайхан, Д.Мөнхтуяа, Захиргааны хэргийн давж заалдах шатны шүүхийн шүүгч Э.Халиунбаяр, нийслэлийн Захиргааны хэргийн анхан шатны шүүхийн шүүгч С.Төмөрбат, Баянгол дүүргийн Иргэний хэргийн анхан шатны шүүхийн шүүгч Н.Хангал нарын зургаан шүүгчид АТГ-ын Мөрдөн шалгах хэлтсээс шалгах хүсэлт гаргасан билээ. Дээрх нэр бүхий зургаан шүүгчийг үндэслэлгүйгээр хөрөнгөжсөн байж болзошгүй гэж мөрдөн байцаагчид үзсэн бөгөөд хэрэг бүртгэлд гэр бүлийн гишүүдийнх нь нэр дээрх хөрөнгийн эх үүсвэрийг тодруулж байгаа аж. Мөн эдгээр шүүгчийн бүрэн эрхийг түдгэлзүүлэх саналыг АТГ-аас прокурорын байгууллагад хүргүүлсэн юм. ШЕЗ-өөс шүүгч нарын бүрэн эрхийг түдгэлзүүлэх эсэх талаар шийдвэр гаргасны дараа нэр бүхий зургаан шүүгчийг АТГ-аас үргэлжлүүлэн шалгаж, мэдүүлэг авах юм байна. Тиймээс Улсын Дээд шүүхийн шүүгч Ч.Хосбаяраас дээрх мэдээлэлтэй холбогдуулан утсаар тодруулга авсан юм.

Таныг АТГ-аас шалгаж байгаа гэсэн. Зарим зүйлийг тодруулж болох уу?

-Мөрдөн шалгах ажиллагааны нууцлалтай холбоотой учир мэдээлэл өгөх боломжгүй.

-Таны хөрөнгө орлогын мэдүүлэгт гэр бүлийн орлого 2015 онд 679 сая, 2016 онд 185, 2017 онд 75 сая төгрөг гэж мэдүүлсэн гэсэн. Энэ үнэн юм уу?

-Хэн тэгж байна вэ?

-Сошиалд тийм мэдээ байна лээ. АТГ-ын хөрөнгө орлогын мэдүүлэгтэй тулгаж үзэх гэтэл тэдний сайт болохгүй байна?

-Тулгаж үзсэн нь дээр. Яагаад ийм мэдээлэл цацагдсныг ойлгохгүй байна. Ийм их хөрөнгө байхгүй.

-Тэгвэл хэдэн төгрөгийн орлоготой юм бэ. Та мэдүүлэгтээ хэд гэж тусгасан юм бол?

-Одоогоор сайн санахгүй байна.

Г.Алимаа