Энэ оны нэгдүгээр сарын 29-ны өдөр ЦЕГ-ийн Хар тамхитай тэмцэх албанаас явуулсан гүйцэтгэх ажиллагааны үеэр удаа дараа хар тамхи зарсан бүлэг этгээдүүдийг баривчилсан. Гэмт этгээдүүд эхний мэдүүлгээрээ Баянзүрх, Чингэлтэй, Сүхбаатар Эрүүгийн хэргийн анхан шатны шүүхэд цахилгаанчнаар ажилладаг 50 настай Б гэгчээс их хэмжээний мөс худалдан авсан гэж мэдүүлсэн юм.
Тиймээс шүүхийн ажилтан Б-г цагдаагийн алба хаагчид ажлын байран дээрээс нь дайчлан баривчилж, шалгалт явуулж эхэлжээ. Сэжигтэн Б-г түүний төрсөн дүүгийн хамт уг хэрэгт холбогдуулан сэжиглэж байгаа юм байна. Шүүхийн ерөнхий зөвлөлөөс уг хэрэгтэй холбогдуулан ажлын хэсэг гарч Баянзүрх дүүрэгт ажилласан байна. Энэ талаар ШЕЗ-ийн Хэвлэл мэдээлэл, олон нийттэй харилцах газрын мэргэжилтнээс тодрууллаа.
-Баянзүрх дүүрэгт ажилладаг цахилгаанчин хар тамхины хэрэгт холбогдсон. Энэ хэрэгт танайхаас шалгалт гарсан гэсэн. Дүгнэлт гарсан уу?
-Одоогоор дүгнэлт гараагүй байна. Дүгнэлт гарахаар дэлгэрэнгүй мэдээлэл өгөх боломжтой.
-Цагдаагийн байгууллагад эд мөрийн баримтаар хураагдсан хар тамхийг тусгайлсан өрөөнд хадгалдаг гэсэн. Шүүхэд ирсэн нотлох баримтыг яаж хадгалдаг юм бэ?
-Нотлох баримтыг бүртгэлийн ажилтан бүртгэж аваад хадгалах өрөөнд хадгалдаг.
-Энгийн нэг цахилгаанчин ороод авах боломжтой юм уу?
-Тийм боломж огт байхгүй. Одоогоор хэрэг мөрдөн шалгах ажиллагаа явагдаж байна. Анх мэдүүлэг өгсөн гэмт хэрэгтэн ташаа мэдүүлэг өгсөн байхыг үгүйсгэхгүй. Дээр нь хэвлэл мэдээллийн хэрэгслээр нотлох баримтаар хураагдсан хар тамхи гэдэг нь нотлогдсон гэж мэдээлсэн байна лээ. Үүнийг эцэслэн тогтоогоогүй учир мэдээллийн үнэн, бодитой эсэхэд хяналт тавихыг хүсэе.
-Энэ хэрэгт холбогдсон ажилтан өмнө нь ийм хэрэгт холбогдож байсан юм болов уу?
-Энэ талаар сайн мэдэхгүй байна.
Г.Нацаг
Сэтгэгдэл (1)