НИТХ-ын ээлжит XXII хуралдаан өчигдөр болж, хуралдаанд оролцсон төлөөлөгчдийн 69.05 хувийн саналаар Р.Дагвыг НИТХ-ын даргаар сонголоо.

НИТХ-ын шинэ дарга Р.Дагва “Цаг орой болсон тул та бүхнийг чилээгээд яах вэ, надад үг хэлэх боломж олон олдоно.  Хэлэх зүйлээ хэлэхээс илүүтэй хийж хэрэгжүүлэхийн төлөө та бүхэнтэйгээ хамтарч ажиллана гэдэгтэй итгэлтэй байна” гэв.

НИТХ-ын ээлжит XXII хуралдааны хэлэлцэх асуудлын  гуравдугаарт эрэмблэгдсэн “Нийслэлд бүртгэлтэй авто тээврийн хэрэгслээс авто зам ашигласны төлбөрийн хувь хэмжээг тогтоох” асуудлыг Улаанбаатар хотын Ерөнхий менежер бөгөөд ажлын албаны дарга Т.Гантөмөр танилцууллаа. Тэрбээр “Нийслэлд бүртгэлтэй авто тээврийн хэрэгслээс авто зам ашигласны төлбөрийн хувь хэмжээний хувьд өөрчлөгдөөгүй бөгөөд холбогдох 1998 онд батлагдсан Авто замын хуулийн дагуу нийслэлийн авто зам, замын байгууламжаар зорчиж байгаа тээврийн хэрэгслээс авто зам ашигласны төлбөр авах журам болон нийслэлийн бүртгэлтэй тээврийн хэрэгслээс  авто зам ашигласны төлбөр, Улаанбаатар хотын шалган нэвтрүүлэх товчоогоор орж ирж байгаа орон нутгийн тээврийн хэрэгслээс авах авто зам ашигласны төлбөр хураамжийг баталж мөрдүүлж ирсэн. 2017 оны долдугаар сарын 1-ний эхлэн Авто замын тухай хууль шинэчлэгдсэнтэй холбоотойгоор Нийслэл, орон нутгийн чанартай авто зам, замын байгууламж ашигласны төлбөр авах замын чиглэлийг баталж, холбогдох журмыг мөрдөж эхэлсэнтэй  холбоотойгоор  төлбөр хураамжийн хувь хэмжээг НИТХ-аар хэлэлцүүлэн батлуулахаар оруулж ирж байна. Төлбөр, хураамжийн хувь хэмжээнд ямар нэг нэмэлт өөрчлөлт ороогүй бөгөөд гагцхүү хуульд нийцүүлэн баталж өгнө үү хэмээн та бүхнээс хүсэх байна” гэв.  Төлөөлөгчдөөс горимын санал гарч, төлбөр хураамжийн хувь хэмжээ өөрчлөгдөөгүй, зөвхөн хуульд нийцүүлэхийн тулд НИТХ-ээр хэлэлцүүлэн тогтоол шийдвэр гаргах тул ямар нэг асуулт, саналгүйгээр шууд батлая гэсэн  санал дэмжигдэж, тус асуудлыг дэмжиж тогтоол гаргахаар боллоо.

Б.Лхам