С1 телевизийн “Цензургүй яриа" нэвтрүүлэгт Ерөнхийлөгч асан Н.Энхбаяр оролцох үеэрээ Худалдаа хөгжлийн банкны хувьчлал УИХ-ын дарга асан М.Энхболдтой холбоотой гэж ярьсан юм. Энэ талаар Livetv.mn сайт тодруулга авсан байна. Энэ талаар УИХ-ын дарга асан М.Энхболд “Н.Энхбаяр ор үндэслэлгүй, баримтгүй, гүтгэлэгийн шинжтэй зүйл ярьсанд би үнэхээр харамсч байна. Унасан дээр нь түлхэнэ гэдэг шиг УИХ-ын даргын албан тушаалаа өгчихсөн юм чинь муу муухай бүхнийг тохож болно гэж бодсон бололтой. Худалдаа хөгжлийн банкны хувьчлалыг намайг Ерөнхий сайд байх үедээ оруулж, Засгийн газар дэмжсэн мэтээр ярьсан. Яг үнэн хэрэгтээ энэ хувьчлалыг Н.Энхбаяр дарга өөрөө Ерөнхий сайдаар ажиллаж байхдаа хувьчилсан. Улсын төсвийн өмнө ямархуу хэмжээний үүрэг хүлээдэг байсан банкийг яаж үнэлж, яаж хувьчилсан нь анхаарал татсан асуудал.
Гадаадын компаниас худалдаж авсныг нь намайг дэмжсэн, оролцсон, ар талд нь байгаа мэтээр ярьсан. Энэ зүйлийг өчигдөр ч ярьсан юм биш. Өмнө нь өнгөрсөн долоо хоногт Худалдаа хөгжлийн банкны хувийг надад М.Энхболд санал болгосон гэж ор үндэсгүй зүйл ярьж байна лээ. Хэзээ ч бидний дунд тийм зүйл болоогүй.
Би УИХ-ын гишүүнийхээ хувиар мэдэгдэл гаргасан. Гүтгэлэгээ засч залруулахыг хүсье гэж Н.Энхбаяр даргад хандаж мэдэгдэл гаргасан ч өчигдөр дахин тийм зүйл ярьсан.
Эрдэнэтийн 49 хувийг худалдаж авсан асуудалд намайг бас оролцсон мэтээр ярьсан. Тэр үед би сөрөг хүчний намын даргаар ажиллаж байсан. Эрх барьж байсан намын л хийсэн хэрэг шүү дээ. Харин ч Н.Энхбаяр даргын удирдаж байгаа нам хамтарсан засаг барьж байх үедээ оролцоотой байсан.
Энэ асуудлыг би өмнө нь хэд хэдэн удаа ярьсан. 2016 оны зургадугаар сарын 28-ны өдрийн сонгуулийн санал хураалтын өмнө "Хэрвээ бид сонгуульд олонх болбол Эрдэнэтийн 49 хувьтай холбоотой асуудлыг нягталж шалгаж үзнэ” гэж мэдэгдэж байсан.
УИХ-ын дарга болсоныхоо дараа холбогдох шийдвэрүүдийг гаргасан. Байнгын хороон дээр ярьж, УИХ-ын тогтоол гаргаж, байгуулсан ажлын хэсгийн оруулж ирсэн саналыг дэмжиж гаргасан. УИХ-ын дэд даргаар ахлуулсан ажлын хэсгийг хүртэл гаргаж ажиллуулсан шүү дээ.
Хууль хяналтын байгууллага энийг шалгаж байгаа. Үнэн зөв нь тогтогдох байх. Хамгийн гол нь хууль хяналтын байгууллага шалгах зүйлээ шалгах ёстой. Миний хувьд нэр төрөө сэргээлгэхээр холбогдох байгууллагад нь хандах бодолтой байна” гэжээ.
Сэтгэгдэл (37)