Эрүүгийн цагдаагийн газраас Ерөнхийлөгч асан Н.Энхбаяраас гэрчийн мэдүүлэг авахаар зарлан дууджээ. Тодруулбал, энэ сарын 21 буюу маргааш 11.00 цагт Эрүүгийн цагдаагийн газрын Эдийн засгийн гэмт хэрэгтэй тэмцэх газрын Мөрдөн шалгах хэлстийн уулзалт, мэдүүлгийн 103 дугаартай албан өрөөнд ирэхийг мэдэгджээ.
Ерөнхийлөгч асан Н.Энхбаяр Цензургүй яриа нэвтрүүлэгт орох үеэрээ УИХ-ын дарга асан М.Энхболдын талаар зарим зүйлийг ярьсан. Үүнтэй холбогдож М.Энхболд гишүүн өөрийг гүтгэсэн гэж үзэн хуулийн байгууллагад хандаж шалгуулахаа мэдэгдсэн.
Тэрбээр “Би УИХ-ын гишүүнийхээ хувиар мэдэгдэл гаргасан. Гүтгэлэгээ засч залруулахыг хүсье гэж Н.Энхбаяр даргад хандаж мэдэгдэл гаргасан ч өчигдөр дахин тийм зүйл ярьсан. Эрдэнэтийн 49 хувийг худалдаж авсан асуудалд намайг бас оролцсон мэтээр ярьсан. Тэр үед би сөрөг хүчний намын даргаар ажиллаж байсан. Эрх барьж байсан намын л хийсэн хэрэг шүү дээ. Харин ч Н.Энхбаяр даргын удирдаж байгаа нам хамтарсан засаг барьж байх үедээ оролцоотой байсан.
Энэ асуудлыг би өмнө нь хэд хэдэн удаа ярьсан. 2016 оны зургадугаар сарын 28-ны өдрийн сонгуулийн санал хураалтын өмнө "Хэрвээ бид сонгуульд олонх болбол Эрдэнэтийн 49 хувьтай холбоотой асуудлыг нягталж шалгаж үзнэ” гэж мэдэгдэж байсан. УИХ-ын дарга болсоныхоо дараа холбогдох шийдвэрүүдийг гаргасан. Байнгын хороон дээр ярьж, УИХ-ын тогтоол гаргаж, байгуулсан ажлын хэсгийн оруулж ирсэн саналыг дэмжиж гаргасан. УИХ-ын дэд даргаар ахлуулсан ажлын хэсгийг хүртэл гаргаж ажиллуулсан шүү дээ.
Хууль хяналтын байгууллага энийг шалгаж байгаа. Үнэн зөв нь тогтогдох байх. Хамгийн гол нь хууль хяналтын байгууллага шалгах зүйлээ шалгах ёстой. Миний хувьд нэр төрөө сэргээлгэхээр холбогдох байгууллагад нь хандах бодолтой байна” гэсэн байдаг.
С.Сүлд
Сэтгэгдэл (47)