Хууль зүй, дотоод хэргийн сайд Ц.Нямдорж С.Зоригийн хэрэгтэй холбоотой асуудлаар мэдээлэл хийлээ. Мэдээллийн үеэр С.Зоригийн амь насыг хөнөөсөн хэрэгтэй холбогдуулж олон ноцтой баримтууд гарч ирсэн хэмээн ярилаа.
-С.Зориг агсны хэрэгтэй холбогдуулан нэмээд хоёр хүнийг саатуулсан гэх мэдээлэл байна?
-С.Зориг агсны амь насыг хөнөөсөн хэрэгт холбогдуулан яллагдсан хэрэгтнүүдийг эрүүдэн шүүх ажил явагдсан. 1937 оны бүх аргыг хэрэглэсэн. Энэ нь тодорхой болсон. Би анхнаасаа энэ талаар ярьж байсан. Хүний хашаанд нас барсан хүний цогцсыг ил хийж байгаа хүмүүс далд үүнээс долоон дор юм хийсэн байх магадлалтай гэж мэргэжлийн мэдрэмжээрээ би ярьж байсан. Энэ асуудлыг Үндэсний аюулгүй байдлын зөвлөл сонсох байх.
Мөрдөн байцаах ажиллагаа явж байна. Тагнуулын хоёр ажилтан цагдан хоригдсон. Шийдвэр гүйцэтгэл Тагнуулаасаа тавигдаад энэ бүх ажиллагааг зохион байгуулахад гар бие оролцсон хүн хоригдсон.
Би сайд болоод нэг хүнийг халсан. Тагнуулын ахлах дэслэгч цолтой хүн хурандаа авчихаад яагаад үүнийг удирддаг юм гэдгийг явуулсан. Ийм учиртай юм. Тэр хүн шалгагдаж байгаа. Шалгалт дахин үргэлжилнэ. Монголд дахин хэзээ ч 1937 оных шиг арга хэмжээ хийж болохгүй болгоно. Би хоёр ялтантай уулзсан. Хүйтэн камерт яаж амьдардгийг би өөрийн нүдээр үзье гэж бодоод тэр хоёр ялтантай уулзсан. Аль аль нь гарсан байна уу тэр хүмүүс. 20-25 жилийн ялтай. Шоронд 20-25 жилийн ял авсан хүнд “тэнсэн” гэж байдаггүй. Ялангуяа ганцааранг нь чанга дэглэмтэй ангид. Тэр эмэгтэй болон Б.Содномдаржаатай уулзсан. Өчигдөр хоёуланг нь эмнэлэгт хэвтүүлсэн. Миний чадаж байгаа юм энэ. Цаашид эмнэлэгт байлгаж байгаад гаргана гэж бодож байна.
Би Б.Содномдаржаагийн, Т.Чимгээгийн ар гэрийнхнээс Монгол Улсын Дотоод хэргийн сайдын хувьд уучлал гуйж байна.
Би амьдралдаа уучлалт гуйж үзээгүй хүн. Гэхдээ одоо уучлалт гуйж байна. Аймшигтай аргууд хэрэглэсэн. 1937 он сэргэснийг би нүдээрээ үзлээ.
Зарим хүмүүс ийм юм хийдэг юм байж. Би энэ хэргийн эцсийг хүртэл явна. Дахиж Монголын хуульчид хэзээ ч хүнийг харгис хэрцгий аргаар эрүүдэн шүүж, яргалдаггүй байлгахын тулд системийн өөрчлөлт хийх хэрэгтэй гэдэг нь харагдаж байна. Би 1970-д оноос хойш Монгол гарч байсан дуулиант хэрэг болгоныг мэднэ. Би ийм аймшигтай юм үзээгүй, сонсоогүй. Ийм аймшигтай юм болсон юм шиг дүр зураг харагдаад байхаар нь чадан ядан би тэмцсэн. Хэд хэдэн удаа хэрэг үүсгүүлсэн. Улам байртай болж хувирсан.
Өмгөөлөгч нарыг их шахаж, хавчиж байсан. Тэмдэглэлийг нь хүртэл хурааж авч улсын нууцад хамруулсан.
Хүүхдийг нь хүртэл хар тамхины хэрэгт холбогдуулж худлаа мэдээлэл цацаж цагдаагийн газар аваачиж байцаасан. Ингэж дарамталж, шахаж байсан.
-Захиалагчийг нь олсон юм уу?
-Захиалагчийг олох биш бүр будлиулсан байна лээ. Хэлээд л байсан юм байна лээ шүү дээ. Тодорхой хүн рүү чиглүүлж нэр усыг нь хэлж, хөрөнгө мөнгө авсан өгснөө ярьсан.
Худлаа ярьдаг ялтанг нь хорих ангидаа шийтгээд эрх мэдэл мөнгөтэй хүмүүсийг нь гаргасан байна лээ. Тэр нь захиалагч яг мөн үү гэвэл биш шүү.
Зориуд тийм баримт бүрдүүлж ядарсан иргэдэд зэм халдаах байдлаар гэмт хэргийг хаах алсын зорилго нь яваад байсан байна лээ.
-Тагнуул, Цагдаагийн даргыг солих гэж байгаа юм уу?
-Би мэдэхгүй байна.
Р.Хишигжаргал
Сэтгэгдэл (13)