УИХ-ын ээлжит бус нэгдсэн чуулганы үдээс хойших хуралдаан үргэлжилж байна. Хэлэлцэж буй асуудалтай холбогдуулж гишүүд зарчмын зөрүүтэй санал хэллээ.
Тухайлбал, УИХ-ын гишүүн Ж.Ганбаатар “Бид хуулийг хууль гэж ойлгодог. Тйимээс энэ нь нарийвчилсан, энэ нь илүү нарийвчлаагүй байна. Энэ нь бага үсэгтэй, энэ нь олон үсэгтэй байна гэж хүмүүст ойлгохгүй. Ялангуяа бизнес эрхлэгчид ойлгохгүй. Би энэ хуулийг юу гэж ойлгож байна гэхээр өөр хуульд нарийвчилж заагаагүй бол татварын хуулийг дагаж мөрдөнө гэж ойлгосон. Би ажлын хэсэгт хэдий багтсан ч ажлын хэсгийнхэн хурлын товыг зарлаагүйгээс эхний хуралд суугаагүй. Д.Тогтохсүрэн, Д.Лүндээжанцан гишүүнээс асуулт асуумаар байна. Нарийвчилна гэдэг дээр тодотгол хэрэгтэй. Жижиг дундын хууль болон бусад хуульд юу гэж заасан нь хамаагүй татварын хуульд заасан заалтыг дагаж мөрдөнө гэсэн ойлголт юм уу. Үүнийг асуумаар байгаа юм. Өөр хуульд нарийвчилж заагаагүй манай хуульд нарийвчилж заасан гэдэг давуу эрхийн заалт байна гэж ойлгосон. Асуулт асууж болохгүй болохоор үг хэлэх л юм байна” гэлээ.
УИХ-ын гишүүн Ц.Бямбацогт “Би Ж.Ганбаатар гишүүний саналыг дэмжиж үг хэлье. Энэ заалтыг эцсийн хэлэлцүүлэг дээр анхаарч үзээч ээ. Тэгэхгүй бол татвар төлөгчдөд хохиролтой заалт болох гээд байна. Хуулийг буцааж хэрэглэхгүй гэдэг зарчим байдаг. Хэрвээ асуудал үүсэх юм бол тухайн асуудал үүссэн цаг үед ямар хууль хэрэглэж байсан түүнээс хойш ямар хууль хэрэглэж байгаа түүнээс хөнгөрүүлэх нөхцөлийг татвар төлөгч буюу тухайн эрх ашиг нь хөндөгдөж байгаа хүн сонгож хэрэглэх эрхтэй гэсэн хуулийн зарчим байдаг. Энэ зарчимтай уг хуулийн заалт зөрчилдөж байна.
Бусад хуульд энэ хуульд зааснаас өөрөөр заасан бол тухайн асуудлыг илүү нарийвчилсан хуулийг, хэрвээ тийм хууль байхгүй бол сүүлд хүчин төгөлдөр болсон хуулийн заалтыг хэрэглэнэ гэж байгаа юм. Тиймээс хуулийг буцааж хэрэглэхгүй гэсэн үндсэн зарчмаа баримтлах хэрэгтэй. Зөвхөн татвар хураах, төсвийн орлого бүрдүүлэх гэдэг өнцгөөс биш татварын албанд илүү давуу эрх олгох үүднээс битгий хандаач ээ. Нөгөө талд нь татвар төлөгч байгаа юм. Татвар төлөгчдийн эрх ашгийг бид бодож байх ёстой. Татвар төлөгчдөд нийцсэн томьёоллыг оруулж ирж цааш нь хэлэлцье” гэлээ.
Р.Хишигжаргал
