Төрийн тэргүүний тангараг өргөсөн Х.Баттулгын албан өрөөндөө хийсэн анхны уулзалт нь Авлигатай тэмцэх газрын дарга Х.Энхжаргалыг дуудан уулзаж ажлаа өгөхийг шаардсан явдал байв. Өөрийн хүсэлтээр өргөдлөө өгсөн хурандаа Н.Ганболдын оронд очсон Х.Энхжаргал албан үүргээ гүйцэтгээд нэг жилийн гаруйн дараа Ерөнхийлөгчийн эсэргүүцэлтэй тулгарсан нь тухайн үедээ анхаарлын төвд орж ярих, бичих сэдэв болж байлаа. Ерөнхийлөгчийн Тамгын газрын зүгээс өөрийн хүсэлтээр чөлөөлөгдсөн Н.Ганболдын оронд Х.Энхжаргалыг нөхөн томилсон ч өмнөх даргынхаа адил хуулийн заалтаар явах ёстой хэмээх тайлбарыг өгч бүрэн эрх нь дуусгавар болсон гэсэн шаардлагыг тавьсаар өнөөг хүрч байна.

Харин УИХ-ын Хууль зүйн байнгын хорооноос Ерөнхийлөгчийн Тамгын газраас өгсөн шаардлагыг хүлээж авах боломжгүй гэсэн хариу өгсөөр хавар, намрын ээлжит чуулган хаалтаа хийсэн билээ. Энэ хугацаанд Ерөнхийлөгчийн албан ёсны вэб хуудсаар дамжуулж АТГ-ын дарга, дэд даргад томилуулах хүнийг олон нийтийн санал асуулгаар тодруулж үзсэн удаатай.

Санал асуулгаар Үндэсний аюулгүй байдлын ажлын албаны дарга, хурандаа Д.Даваа-Очир, ШШГЕГ-ын дэд дарга асан, хурандаа Ж.Батсайхан нар олон нийтийн дэмжлэг хүлээснийг зөвшилцөхөөр УИХ-ын даргад хүргүүлж байлаа шүү дээ.

Харин энэ удаад ээлжит бус чуулганы хуралдаанаар хэлэлцэх асуудлын дараалалд АТГ-ын даргыг чөлөөлж, орных нь хүнийг томилуулах Ерөнхийлөгчийн санал дахин орж ирээд байна. Ерөнхийлөгчийн зүгээс УИХ-ын дарга Г.Занданшатарт хүргүүлсэн санал, Тамгын газрынх нь дарга З.Энхболдын тайлбараар Д.Даваа-Очир, Ж.Батсайхан нарын нэрийг дахин өргөн барьжээ.

Албан бус эх сурвалжийн мэдээллээр Ерөнхийлөгчөөс АТГ-ын удирдлагад нэр дэвшүүлсэн хоёр эрхмийг МАН-ын бүлгийн хуралдаанаар хэлэлцээд санал нэгдсэн тухай мэдээлэл байна.

Нэг үгээр Ерөнхийлөгч Х.Баттулга, Ерөнхий сайд У.Хүрэлсүх хоёр зарчмын хувьд санал нэгдсэн хэрэг. Тийм байж болох. Гэхдээ энд нэг асуулт байна.

Парламентад 64 суудлыг бүрдүүлж байгаа МАН-ын гишүүдийн толгой нь “хамуурчихаагүй” л юм бол сөрөг хүчнийхээ намын даргын итгэлт андыг АТГ-ын удирдлагаар томилох уу. Сөрөг хүчний дарга гэдэг С.Эрдэнэ. Хурандаа Д.Даваа-Очирын хувьд АН-ын даргын итгэлт анд нь төдийгүй еэвэнгийн хоёр тал болтлоо нөхөрлөсөн шадар хүн нь.

Сонгууль дөхсөн энэ үед сөрөг хүчний автортой хүнийг томилж, унах нүхээ өөрсдөө ухах үйлдэл МАН, Ерөнхий сайд У.Хүрэлсүхээс гарахгүй л болов уу, хурандаа Д.Даваа-Очир унана. МАН-ын гишүүд ч дэмжихгүй.

2012 оны сонгуулийн өмнөхөн МАН-ын батлахтай нэр дэвшигчид АТГ-ын үүдэнд “дугаарлаж” явсан гашуун түүх тэдэнд бий учраас энэ удаагийн эрсдэлээ эрх баригч намынхан тооцож л таарна.

Харин Х.Баттулгыг Ерөнхийлөгчид нэр дэвшүүлсэн, бүр сонгогдох хүртэл нь дэмжсэн АН-ын дарга С.Эрдэнэд Төрийн тэргүүний зүгээс төлөх өр нь АТГ-ын даргын сэнтий байсан байж мэдэх. АН-ын даргад төлөх өр нь эхлээд Д.Даваа-Очирыг Үндэсний аюулгүй байдлын зөвлөлийн ажлын албаны даргаар томилсноор тодорч, энэ удаад АТГ-ын даргад нэрийг нь дэвшүүлж байгаа гэсэн үг. Тэгэхээр АТГ-ын даргад Д.Даваа-Очирын нэрийг дэвшүүлсэн нь Ардын намынхныг ямар хандлагатай байгааг харах гэсэн Ерөнхийлөгчийн тандалт болов уу.

Нэгэнт сөрөг хүчнийхээ намын даргын шадар хүнийг АТГ-ын удирдлагад томилж, өөрсдөдөө гал дуудахгүй нь МАН-ын гаргах шийдвэр биш учраас Д.Даваа-Очирын араас хэнийг нэр дэвшүүлэх вэ гэсэн асуулт саарал ордонд дахин хөврөх нь. Дахиад өөр хувилбар яригдаж таарна. 

Түүгээр дамжин Ерөнхийлөгч Х.Баттулга, Ерөнхий сайд У.Хүрэлсүх нарын зөрчил албан ёсоор эхлэхийг үгүйсгэхгүй.

С.Сүлд