Аюулгүй байдал, гадаад бодлогын байнгын хорооны өнөөдрийн хуралдаанаар Зэвсэгт хүчний Жанжин штабын даргын томилгоог хэлэлцэж байна.

Зэвсэгт хүчний Жанжин штабын даргад А.Ганбатын нэрийг дэвшүүлснийг Ерөнхийлөгчийн Тамгын газрын дарга З.Энхболд танилцууллаа.

Энэ үеэр Засгийн газрын Хэрэг эрхлэх газрын дарга Л.Оюун-Эрдэнэ "Амжилт хүсье. Ийм зүйл хийгээрэй гэж захихаасаа илүү төрийн сүлддээ үнэнч, ёс зүйтэй байгаарай. Үр хүүхэд чинь үлдэнэ шүү. Байгууллагынхаа нэр төрийг бодож ажиллаарай. Хувь хувьсгалаа ялгаарай, томилсон хүндээ биш төрийн сүлддээ үнэнч байгаарай гэж захихаар нөхцөл байдалтай байна” гэв.

Харин Зам тээврийн сайд Б.Энх-Амгалан "Таныг хэдэн зүйлд анхаарал тавиасай гэж хүсч байна. Сүүлийн 25 жилд огт улстөржөөгүй салбар бол батлан хамгаалах салбар гэж боддог. Би цэрэг, цэргийн офицеруудыг улстөржиж байхыг хараагүй. Цэргийн нисэх хүчний асуудалд анхаараарай" гэлээ.

Ингээд санал хураалт явуулахад байнгын хорооны 14 гишүүн дэмжиж 93.3 хувийн саналаар А.Ганбатыг Зэвсэгт хүчний Жанжин штабын даргаар томилох саналыг дэмжсэн юм.

Р.Хишгээ