Шинэ нам байгуулж байгаа талаараа Ж.Батзандан, Л.Болд нар мэдээлэл хийлээ.

УИХ-ын гишүүн Ж.Батзандан хэвлэлийн хурлын үеэр С.Зоригийн амь насыг хөнөөсөн хэрэгт гэмгүй хүмүүсийг ялласан. Эрүүдэн шүүж, хэлмэгдүүлсэн. Хэрэгт холбогдсон хүмүүс дарамтлуулж, хэрэг хүлээснээ бидэнд бичгээр мэдэгдсэн. Өнөөдрийн чуулганаар энэ асуудлыг ярьж байна. Нууцын зэрэглэлтэй учир дэлгэрэнгүй мэдээлэл өгөх боломжгүй. Үдээс хойш Үндэсний аюулгүй байдлын зөвлөлийн хурлаар энэ асуудлыг хэлэлцэнэ. Дээд шүүхийн шүүгч Зоригт энэ хэргийг даргалсан. Энэ хүнийг экс Ерөнхийлөгч томилсон. Ингэхдээ хоёр удаа хууль зөрчиж бүрэн эрхийг нь сунгасан. Бүлэглэлд үйлчилдэг шүүгч шүү дээ. С.Зоригийн амь насыг хөнөөсөн хэргийн шүүн таслах ажиллагаанд оролцсон шүүгчийн 70 хувь нь МАНАН-гийн тал. Хэргийг илрүүлсэн гэх ТЕГ-ын дарга асан Б.Хурц мөн ялгаагүй. Дээр нь тагнуулын ажилчдыг шүүхийн шийдвэр гүйцэтгэхэд томилж байгаад дарамталсан. Ц.Нямдоржийн ярьсан бүхэн үнэн.   

Дараагийн нэг зүйл нь Т.Аюурсайхан гишүүнийг долоо хоног доромжиллоо. С.Баярцогтын оффшор дансны баримтыг авчирсан нь буруу, хүний хувийн нууцад халдлаа гэлээ. Оффшорчдын дансыг ил болгоход миний бие гар бие оролцсон. Бидний тэмцэл 2014 онд ил болгосон. Таван жилийн дараа үр дүн гарч байна. Үүнээс хойш оффшортой холбогдох явдал багасна. Хатуу шаардлага тавих хэрэгтэй. С.Баярцогтыг суллавал оффшортой тэмцэх ажил зогсоно. Ирэх долоо хоногт АТГ-ын даргыг солих асуудал яригдана. Хуульт ёс тогтохгүй бол хэчнээн ардчилал байгаад хэрэггүй.  

Нөгөөтэйгүүр, шинэ нам байгуулахын тулд 30 мянган гарын үсэг цуглуулах ёстой. Одоогоор 5000 хүн гарын үсэг зурж, хүсэлтээ илгээсэн. УИХ-ын гишүүн А.Сүхбатын ах А.Батсүх манай намд элсэх хүсэлтээ илгээсэн. Мөн дуучин Далантай, “Тролейбус” компанийн захирал Жаргалсайхан зэрэг хүмүүс нэгдэхээ мэдэгдсэн. Энэ мэтчилэн олон хүн бидэнтэй хамт мөр зэрэгцэхээ мэдэгдлээ. Шинэ намдаа ямар нэр өгөхөөр ярилцаж байна. Эхнээсээ гурван нэр тодорлоо. Энэ нь  “Монголоо өөрчилье”, “Шинэ ардчилсан нам”, “Ардчилал, шударга ёсны төлөө” гэсэн гурван нэр тодорсон. Хэрвээ манай намд нэр өгөхийг хүсвэл бидэн санал болгоорой. Бид хүлээж авна.

Түүнчлэн энэ сарын 23-нд Эрдэнэт хотод уулзалт зохион байгуулна. Энэ үеэр С.Зоригийн амь насыг хөнөсөн хэрэг, Эрдэнэт үйлдвэрийн асуудлаар мэдээлэл өгнө. 24-ний өдөр нь Дарханд уулзалт хийнэа. “Дарханы төмөрлөгийн үйлдвэр”-ийг яаж луйвардсан талаар ярина” гэлээ.

Харин УИХ-ын гишүүн Л.Болд “Сүхбаатарын талбайд цуглсан хүмүүс МАНАН-г устгахын төлөө гараа өргөсөн. Бид МАНАН-г устгахын төлөө тэмцэх болно. АТГ-ын даргыг солих асуудлыг хэлэлцэнэ. Бүх нийтийн ажил хаялтыг ирэх сарын 11-нд зохион байгуулна. Хуулийн байгууллагын өмнө суулт хийнэ” гэв.

Г.Нацаг