УИХ-ын чуулганы нэгдсэн хуралдаанаар Зэвсэгт хүчний Жанжин штабын даргаар А.Ганбатыг томилох эсэх асуудлыг хэлэлцэж байна. Хэлэлцэж байгаа асуудалтай холбогдуулж гишүүд байр сууриа илэрхийлж байгаа юм.
Д.Цогтбаатар: А.Ганбат генералыгаа дэмжиж байна. Мэргэжлийн, туршлага нь ханасан хүн. Олон жил хамтарч ажиллаж байгаагийн хувьд ажлаа тэнцвэртэй, ур чадвартай бүрэн хийж чадна гэж итгэж байна. Энхийг сахиулах үйл ажиллагаа Монголын нэрийн хуудас болтлоо хөгжсөн. А.Ганбат генерал энэ ур чадварыг нэмэгдүүлэхэд гар бие оролцсон хүний нэг. Танд нэг юм захимаар байна. Саяхан би Судан руу яваад ирлээ. Манайхан бэлтгэл мэргэжил нь мундаг байна, бахархаж байгаа. А.Ганбат генерал аа манай генералууд акедимик судалгааг өөрсдөө ангил хэл дээр бичиж мэргэжлийн сэтгүүлүүдэд гаргадаг байх хэрэгтэй. Газар дээрээ гардаад ажил хийдэг туршлагатай байгаад зогсохгүй онолын түвшинд бэлтгэгдсэн олон улсад судалгааны ажил нь уншигддаг хэмжээний болох хэрэгтэй. Би та нарыг чадна гэдэгт бүрэн итгэлтэй байна.
Б.Пүрэвдорж: УИХ-ын гишүүд А.Ганбат генералыг магтаж, ур чадвар бусад асуудлыг ярилаа. Тиймээс энд болохгүй байгаа зүйлээ яръя. УИХ-ын гишүүдийн баталсан хоёр хуулийг тодорхой заалтуудаар зөрчиж байна. Тэр хуулийн заалтыг хэлж өгье. Цэргийн албаны тухай хуулийг 2016 оны есдүгээр сарын 1-нд баталсан. Цэргийн албаны тухай хуулийн 11 зүйлийн 11.4-т зааснаар оффцерийн албыг дээд офицер 57 нас хүртэл хаана гэсэн заалт байна. Нас хэтэрсэн байна. хоёрдугаарт, Цэргийн албаны тухай хуулийн 19 зүйлийн 19.4-т заасан орон тоог зохион байгуулалтын өөрчлөлт, ар гэрийн гачигдал цэргийн албанаас чөлөөлөгдсөн бэлтгэл оффцерийг цэргийн албанаас чөлөөлөгдсөнөөс хойш таван жилийн дотор эргүүлэн авч болно гэсэн заалт байгаа юм. Тэгвэл А.Ганбат генерал 2009 онд тэтгэвэртээ гарсан. Тиймээс таван жилийн хугацаа хэтэрсэн байна гэсэн үг. Гуравдугаарт, Цэргийн албаны тухай хуулийн 19-р зүйлийн 19.5-т заасан алба хаах насны дээд хязгаар хүрч, цэргийн тэтгэвэр тогтоолгосон дээд оффцерийг оффцерийн орон тоонд ажиллуулахыг хориглоно гэсэн Цэргийн албаны тухай хуулийн гурван заалтыг зөрчиж байгаа юм. Дээрээс нь бид Төрийн албаны тухай хуулийг өнгөрсөн онд баталсан. Нэгдүгээр сарын 1-нээс хэрэгжиж явж байгаа. Төрийн албаны тухай хуулийн 26-р зүйлийн 26.4-т заасан “Төрийн албан тушаалд шатлан дэвшүүлэх журмыг баримтална” гэсэн заалт бий. Өөрөөр хэлбэл, тэнд алба хааж байсан хүмүүс дээшээ дэвшээд явах заалтыг зөрчсөн байна. Тиймээс бид өөрсдийн баталсан хуулийг зөрчиж байгаа хүнийг томилох гэж байна. Иймээс гишүүд хуулиа дээдэлж асуудалд хандана уу гэж хүсч байна гэв.
Чуулганы хуралдаан үргэлжилж байна.
Р.Хишгээ
Сэтгэгдэл (3)