Ээлжит бус чуулган энэ долоо хоногийн маргааш хаана. Энэ долоо хоногийн ээлжит бус чуулганаар Засгийн газраас 2018 оны арваннэгдүгээр сарын 21-ний өдөр өргөн мэдүүлсэн Ашигт малтмалын тухай хуульд нэмэлт, өөрчлөлт оруулах тухай хуулийн төсөл болон хамт өргөн мэдүүлсэн Ашигт малтмалын тухай хуульд нэмэлт, өөрчлөлт оруулах тухай хуульд өөрчлөлт оруулах тухай хуулийн төсөл болон Улсын ерөнхий прокурорын орлогчийг зөвшилцөх тухай асуудлыг хэлэлцэхээр төлөвлөсөн байна. Үүнээс гадна хэлэлцэх асуудлын дарааллын хамгийн сүүлд Авилгатай тэмцэх газрын дарга, дэд даргыг томилох эсэхийг хэлэлцэхээр товложээ.

Ашигт малтмалын тухай хуулийн нэмэлт, өөрчлөлт, Улсын ерөнхий прокурорын орлогчийг зөвшилцөх асуудлыг УИХ-аар хэлэлцэх нь мэдээж. Харин АТГ-ын дарга, дэд даргыг өнөөдөр, маргааштаа багтаан хэлэлцэж, өөрчилж чадах уу гэдэг нь эргэлзээтэй. Учир нь АТГ-ын дараагийн даргыг Ерөнхийлөгчийн зүгээс нэр дэвшүүлсэн. Энэ нь хуульд заасан бүрэн эрхээ хэрэгжүүлж байгаа мэт харагдавч цаагуураа улс төрийн тохироо, ашиг сонирхол явж буйг үгүйсгэх аргагүй. Адаглаад АТГ-ын даргад нэр дэвшүүлсэн хурандаа Д.Даваа-Очир нь АН-ын дарга С.Эрдэнийн амин найз. Тэгэхээр сөрөг хүчнийхээ автортой хүнийг АТГ-ын даргаар томилж, өөрсдөдөө гал дуудах нь МАН-д эрсдэлтэй.

Тэдэнд ЖДҮ-ийн асуудлаас эхлээд түрүүчээсээ шалгуулж, хуулийн байгууллагын хаалга татсан хэрэг олон. 2020 оны сонгууль ч жил гаруйн дараа болно. Хувьсгалын тохироо нь бүрдээгүй л юм бол Ерөнхийлөгчийн санал болгосон хүнийг АТГ-ын даргаар томилж толгой дээрээ бөмбөг тэслэх эрсдэл МАН-д байхгүй гэсэн үг. Эрх биш 2012 оны сонгуулийн өмнөхөн МАН-ын нэр дэвшигчид АТГ-ын үүдийг сахиж байсан түүх тэдэнд бий. Тэгэхээр АТГ-ын даргыг томилох эсэх асуудлыг энэ удаагийн ээлжит бус чуулганаар хэлэлцэж амжихгүй болов уу. Харин ирэх сард нээлтээ хийх хаврын чуулганаар энэ асуудал өндрөө авах магадлал нь өндөр.

Р.Хишигээ