Тэр УИХ-ын гишүүн биш. Ерөнхий сайдын хэмжээнд шийдвэр гаргах хүн бүр ч биш. Сайдын суудал санал болгосон ч татгалзах нэгэн. Гэхдээ өвдсөн, зовсон, шантарсан нэгэнд ээж, эхнэр, эгч магадгүй дүүгийн хувиар тусалж, дэмжих сэтгэл түүнд байдаг ажгуу.

Тийм байлаа ч тэр улстөрчид шиг бусдаас, нийгмээс оноо авахыг эрмэлзсэнгүй. Улаан тууз хайчилсангүй... 

Заримдаа тэр хэтэрхий алиа хошин зантай болчихдог. Тэгсэн мөртлөө өдөр бүр /хэд хэдэн телевизээр гарч байгаа реклам сурталчилгаа/ гунигласан царайтай байх нь энүүхэнд. Түүний харц, хэлж буй үг бүр нь өнгөрснөөс өнөөдрийг хүртэлх үеийнхний баяр баяслыг тээж өгүүлэх атлаа эмэгтэй тэр дундаа эхнэр хүний нуруун дээр өнөөг хүртэл тээглэж ирсэн “ачааг” өөрт ногдсон дүрээрээ дамжуулан бул хар чулуу мэт “төлөөлүүлж”, түүнийгээ хөнтрөөд хаядаг дүр мэт ойлгуулдаг. Өөрөөр хэлбэл, тэрбээр “Өдөр бүр хийх ажлаа бичээд, хийж гүйцээнгүүтээ дараад явах урамтай. Өдөрт 5-6 ажил амжуулна гэж төлөвлөөд, араас нь хөөцөлддөг” хэмээн нэгэнтээ ярьж байв. Үнэн л дээ. Түүнийг хүн болгон таньдаг л юм, хүүхдүүд ч мэднэ. Бүр хошин шог, тэр дундаа жүжигчин, тэгээд цаад дүртэй нь зүйрлэж, адилтгаж ярьж, дүгнэдэг. Ортой төсөөлөл, ханатай дүр. Хувь жүжигчнийх нь тухайд...

Түүний зан араншингаас бүгдээрээ нэгийг бодож тунгаадаг, магадгүй өөр нэгэн нь ухаардаг. Эсвэл хаа нэг газар, магадгүй телевизээр гардаг түүнтэй “таарах”-аараа “Өнөөх нэг жүжигчин” гэсэн асуултыг тавихад хүргэдэг, түүний дараагийн үеийнхэн. Энэ бол тэрний ТАЙЗАН дээрх дүр. Бусдаар тэр жирийн нэгэн. Халамжит хань. Хариуцлагатай ээж. Хүүхдээ хүний дайтай өсгөж яваа энгийн нэгэн эзэгтэй. Жирийн Монгол бүсгүй. Бусадтай адилхан эхнэр хүн. Хийж, хэрэгжүүлж байгаа үйлсээрээ нийгэмд сайн сайхныг түгээж яваа эмэгтэй. Гагцхүү түүний хэлсэн үг, хийж байгаа үйлдэл нийгэм рүү чиглэж, нэлээд хэсгийг хамардгийг энд өгүүлэх гэсэн юм.

1992 онд СУИС-ийг төгссөн тэрбээр Эрдэнэт хотын театрт хүүхэлдэйн, инээдмийн, драмын жүжигт гурван жил авьяасаа сорьжээ. Уг үйлдэл нь алдаагүйг өнөөдрийн амжилт нь илтгэнэ. Удалгүй хошин урлагт хөл тавьж “Шинэ үе” продакшны жүжигчин болсноор тэр олон нийтэд өөрийгөө нээжээ.

Цаг хугацаа улиран одсоор, тэр ч өөрийн гэсэн хүрээлэл, үзэгчдийн танил болж эхлэв. “Амбий, Боёо, Хүрлээ, Аглуу тэргүүтэй тэр үеийнхний төлөөлөл одоо ч хошин урлагаар дамжуулан, “Хошин урлаг” хэмээх тайзыг эзэгнэх болов.

Урлагийн тайзнаа дөнгөж гарч эхэлсэн түүнд ганц л “зовлон” байв. Ухаан орохоос эхлээд оюутан ахуй цаг хүртэл нь дэмжиж, дэмнэж явсан аав нь хүндээр өвджээ. Өвчин зовлон гэдэг өр зүрх рүү шууд тусдаг, хүн бүрийн амьдралд хүндээр тусдаг асуудал.

Улсын клиникийн I эмнэлэгт хэвтэн эмчлүүлж байхад тэрбээр хүлээлгийн хонгилд хэдэн хоногийг өнгөрөөжээ. Эмнэлгийн хонгилд эцэг, эхээ сахиж өнгөрөөх тийм ч таатай зүйл биш байв. Энэ үеэс “Хошин шогийн жүжигчин” тэр “Хонгилын үзүүрт гэрэл асаагч” болж өөрчлөгджээ. Урлагийн тайзнаа жүжиглэх авьяас нь унтарсангүй. Өөрийгөө улам хурцлах шалтгаан болж удаа дараагийн сайн үйлсийн эхлэлийг тавихад нь хөтлөв.

Эхлээд тэр 26 сая төгрөгөөр Улсын клиникийн нэгдүгээр амаржих газрын хүлээлгийн танхимыг засаж тохижуулж, иж бүрэн камержуулсан “Аавуудын өрөө”-г бий болгов. Эх хүн хүүхдээ төрүүлэх нь хорвоогийн хамгийн сайхан үйл явдал ч тэдэнтэй адил баясаж хөөрдөг нь аавууд. Тэнд хүүхдээ өлгийдөн авсан аавууд баярлав. Тохьтой, тухтай тохижуулсан өөрөө нь тэдэн урам хайрлав. Аавуудад амьдрал ямар амттайг илтгэсэн бүсгүй УНТЭ-ийн Яаралтай түргэн тусламжийн иргэдийн хүлээх танхим, өвчтөний үзлэгийн өрөө, ариун цэврийн хоёр өрөө зэрэг нийт 220 метр квадрат талбайг 89 сая төгрөгийн хөрөнгө оруулалтаар засаж тохижуулав.

Араас нь Эх хүүхдийн эрүүл мэндийн үндэсний төвийн Хүүхдийн зөвлөх поликлиникийн хүлээлгийн танхимын 220 метр квадрат талбай буюу хүлээн авах хэсэг, хүүхдийн тоглоомын өрөө зэргийг 89.2 сая төгрөгөөр тохижуулсан юм. Хажуугаар нь “Авьяас” хүүхдийн ордны гал тогооны өрөөг ч засаж өгчээ.

Ийн явсаар Сонгинохайрхан дүүргийн Эрүүл мэндийн төвийн харьяа Баянхошуун дахь салбар амбулаторийн хүүхдийн эмчийн өрөө, вакцин тарих сувилагчийн өрөө, вакцин хадгалах, хувцасны өрөө бүхий 72 метр квадрат хүүхдийн кабинет, 64 метр квадрат хүлээлгийн танхимыг гуч гаруй аж ахуйн нэгж, хувь хүний хандивласан 35 сая төгрөгөөр мөн засварлан мөн тохижуулав.

Энэ мэтчилэн үүсгэн байгуулсан “Итгэлийн танхим” төрийн бус байгууллагаараа дамжуулан тэрбээр сүүлд Хан-Уул дүүргийн Нэгдсэн эмнэлгийн хүүхдийн тасгийг бүрэн тохижуулж, хүлээлгэн өгсөн билээ. Өдгөө тэрбээр Баянхонгор аймгийн Нэгдсэн эмнэлгийн Яаралтай түргэн тусламжийн тасгийг MCS групптэй хамтран тохижуулахаар зэхэж байна. Энэ тухайгаа “Орон нутгийн нэгдсэн эмнэлгийн тасгийг тохижуулахаар болж зураг төслөө хараад ямар байгаа бол доо гэж бодсон. Ирээд хартал тохитой сайхан байна. Засвар хийгдээгүй таван жил болсон гэнэ. Сэтгэлд нийцсэн тухтай орчинд ажиллаж байгаа нь сайн. Засварын ажил хоёроос гурван сар орчим хугацаанд хийгдэх нь гэж тооцсон. Найм дахь удаагаа эмнэлэг тохижуулах сайн санааны аян маань эхэлж байна” гэжээ.

Сү.Батболд, Н.Алтанхуяг, Ж.Эрдэнэбат, У.Хүрэлсүх гэсэн дөрвөн ч Ерөнхий сайд, Засгийн газрын үед Яармагт шавыг нь тавьсан атлаа өнөөг хэр нь ашиглалтад оруулж чадалгүй яваа 300 ортой төрөх эмнэлгийнхээ "бараа"-г нь хараагүй л явна, бид. Тэр хугацаанд солигдсон сайд нарын тоо нь алдуурсан болохоос төрөх эмнэлгийн буурин дээр тоосго нэмэгдсэн нь юу л бол. Гагцхүү бодлого ярьж, холын юм ярихаас илүүтэй өнөөдөртөө хэрэгтэй байгаа зүйлийг нь тэдний өмнөөс хэн нэгэн, бусдын дэмжлэгтэйгээр хийж яваа тун цөөн, тэдний нэг нь нийтлэлийн гол дүр. Түүнийг жүжигчин Гончигийн Ундармаа гэдэг.

С.Гандөл