Нийслэлийн Засаг дарга Д.Сумъяабазар, Ерөнхий сайд асан М.Энхсайхантай хамтарч Улаанбаатар хотын хөгжил дэвшилд хувь нэмэр оруулж, хотын эдийн засгийг сайжруулах ажил хийгдэж байгаа тухай мэдээллээ. Тэрбээр түгжрэлийг бууруулах тухай сэтгүүлчдийн асуултад ингэж хариуллаа.  "Түгжрэл ярилаа гээд түгжрэл буурахгүй. Үүнийг цогц төлөвлөлтөөр хийнэ. Буруу жолооны хүрдтэй машиныг хориглолоо гээд түгжрэл буурна гэж ойлгож болохгүй, зогсоол, нийтийн тээвэр, такси үйлчилгээ, гүүрэн байгууламж, зам, орон сууцны төлөвлөлтүүд зэрэг нэгдэж байж түгжрэлийг бууруулах цогц төлөвлөлт болно. Улаанбаатар хот 1,6 сая хүн амтай. Тиймээс хүн амын зөв зохицуулалт, хөдөлмөрийн бүтээмжид суурилсан зохицуулалттай эдийн засаг болгож дэмжье. Үүний тулд хувийн хэвшлийг дэмждэг бодит тогтолцоог бий болгохоор ажиллаж байна. Эх оронч сэтгэлтэй, Улаанбаатар хотоо гэсэн үнэлэмжтэй иргэд, аж ахуйн нэгж байгаасай гэж хүсч байна. Мэдээж энэ ажлыг хийж гүйцэтгэхэд чадварлаг мэргэшсэн хүмүүстэй хамтарч байна. Үүнээс цохон дурьдахад Ерөнхий сайд асан М.Энхсайханыг Улаанбаатар хотын хөгжил дэвшилд хувь нэмэр оруулж, хотын эдийн засгийг сайжруулахын төлөө хамтарч ажиллах санал тавьсан. Энэхүү саналыг маань тэрбээр дэмжээд ажиллаж байна" гэв. 

Т.Мөнхжаргал