Улстөрчид нэг үеэ бодвол холын амбицаа дарж улс төр хийдэг болоод байгаа юм. Хэдэн “поп”-ыг эс тооцвол дийлэнх нь тийм болсон. Энэ буруу биш. Цаг төр тайван бус байна. басхүү Монголын улстөрчид тодорхой хэмжээнд төлөвшиж байгаагийн илрэл юм.

Саяхан Ч.Лодойсамбуу гишүүн Ерөнхий сайдыг огцруулах санал гаргасан. Түүнийг мэдэгдэл хийсэн мөчөөс л хэд хэдэн улстөрч “Дараагийнх нь болж магадгүй” гээд биеэ чангалаад эхэлсэн. Тэдний нэг нь одоогийн Батлан хамгаалахын сайд С.Бямбацогт юм. Угаасаа нэг танхимд сууж байгаад л унахаар нь өгсөөд Ерөнхий сайд болдог жишиг Монголд тогтсон л доо.

Тэгээд ч С.Бямбацогт Ерөнхий сайд болох эрэмбэтэй улстөрчийн тоонд олон жилийн өмнөөс бичигдсэн. 2012-2016 онд МАН цөөнх байхад УИХ дахь бүлгийн дарга гэдэг халуун, хариуцлагатай албыг хашиж байлаа. Сайн ч хийсэн. Тухайн үед МАН-ын удирдлагууд дэндүү “аядуу зөөлөн” хүмүүс байсан. Тийм болохоор намынх нь сөрөг хүчний ачааг УИХ дахь бүлэг нь дааж байв.

2016 онд МАН ялж намын дарга М.Энхболд УИХ-ын дарга болсноор “Ерөнхий сайд хэн болох вэ” гэдэг дээр ихээхэн яриа хөөрөө болсон. Ерөнхий сайд болчих чансаатай гурван хүний нэгээр С.Бямбацогт нэрлэгдэж байлаа. Гэвч намын дарга нь өар сонголт хийсэн. 2017 онд Ж.Эрдэнэбатыг огцроход дараагийн Ерөнхий сайдаар У.Хүрэлсүхтэй зэрэгцээд л яригдаж байв. Сүүлд 2022 онд түүнийг Л.Оюун-Эрдэнийн оронд Ерөнхий сайд болох нь гэж бас яригдсан.

Ул суурьтай эх сурвалжийн хэлж буйгаар, С.Бямбацогт Ерөнхий сайд болох боломж тохиовол татгалзахгүй, бодохгүйгээр “Болъё” гэхээр байгаа юм байна. Хэрвээ ойрын нэг, хоёр жилд ийм боломж ирэхгүй бол 2027 онд Ерөнхийлөгчийн сонгуульд өрсөлдөх бодолтой байгаа бололтой.

Ер нь бол тэр үгээр хэлээгүй ч үйлдэл нь үүнийг нотлоод л байна. Ерөнхийдөө С.Бямбацогтыг чадвал Ерөнхий сайд, үгүй бол Ерөнхийлөгчид “үзэх” бэлтгэлээ хангахад Батлан хамгаалахын сайдын суудал ч гайгүй тохироод байгаа бололтой.

С.Бямбацогт нь Ховд аймгийн Жаргалант сумын Ерөнхий боловсрлын II сургууль, Санхүү эдийн засгийн дээд сургуулийг эдийн засагч, Нидерландын Маастрихтын Их сургуулийг эдийн засагч, МУИС-ийн ХЗС-ийг эрх зүйч мэргэжлээр тус тус төгссөн.

2000 оноос "Ховдын өргөө" ХХК-ийн ерөнхий захирал, "Нью Прогресс" ХХК-ийн захирал, ТУЗ-ийн дарга, ерөнхийлөгч, 2008 оноос УИХ-ын гишүүнээр тасралтгүй сонгогдож байгаа юм. Энэ хооронд ХЗДХ-ийн сайд, ЗТХ-ийн сайдаар томилогдож байв. Одоо Батлан хамгаалахын сайдаар ажиллаж байна.

Т.Молор