Үндэсний их баяр наадамд зориулсан хүчит бөхийн барилдаанд Баянхонгор аймгийн Жинст сумын харьяат, Улсын начин Э.Батмагнай ес даван түрүүллээ. Иймд Баянхонгор аймгийн уугуул Ерөнхий сайд Г.Занданшатар баярласан сэтгэгдлээ хуваалцлаа.

Тэрбээр"Үндэсний их баяр наадмын хүчит бөхийн барилдаанд Баянхонгор аймгийн Жинст сумын харьяат, улсын начин, нутгийн дүү Э.Батмагнай 9 даван түрүүлж, Монгол УЛСЫН АРСЛАН цол хүртэж наадамчин олноо магнай хагартал баярлууллаа.

Баянхонгор аймгийн БААЦАГААН сумын харьяат Монгол улсын аварга малчин П.Сэмнээ агсны зээ хүү, Монгол Улсын идэр шаламгай начин П.Нямжанцангийн зээ дүү Баянхонгор аймгийн Жинст сумын уугуул Энхтүвшингийн БАТМАГНАЙ хонгор нутгаас 76 жилийн дараа үндэсний бөхийн түрүү дахин тодорсон түүхэн амжилт боллоо.

Нийт монголчууд, наадамчин олон, хонгор нутгийнхныгаа өндөлзүүлэн, 512 бөхийн манлай болж, түрүүлсэн шинэхэн улсын арсландаа халуун баяр хүргэе. Үндэсний их баяр наадмын хүчит бөх, сур, шагай, хурдан морины уралдаанд амжилт гаргасан бүх хүнд чин сэтгэлээс халуун баяр хүргэе" гэжээ.