24tsag.mn "GenZ-ийн нүдээр улстөрчид" хэмээх шинэхэн булангаа уншигчдадаа толилуулж байна. Энэхүү буланд бичигдэх эхний улстөрч бол Ерөнхийлөгч асан, УИХ-ын гишүүн Х.Баттулга буюу ЖЕНКО. GenZ-д түүний тухай эргэцүүлэл байна.
Монголчууд хөмсгөө зангидсан, сөөнгө хоолойт, хүдэр бахим Ерөнхийлөгчтэй байсан нь одоогоос хэдхэн жилийн өмнө. Түүнийг монголд жүдог хөгжүүлсэн, монгол жүдочдыг дэлхийн тавцанд гаргаж ирсэн бөхийн зүтгэлтэн гэж л дуулсан болохоос монголын сайн сайхны төлөө хоёргүй сэтгэлээр зүтгэсэн улстөрч эсвэл Ерөнхийлөгч гэж дуулж байсангүй. Манай зон олон барилддаг аргил баргил эрчүүдэд хайртай юм болохоор, бөхийн цаадах мөн чанар, гол нь ид хав тэгширсэн эр хүний дүр төрхөнд дуртай юм болохоор бөхчүүдээ дээдэлж, тэргүүн дээрээ залсан тохиолдлуудын нэг нь л Х.Баттулга мөн.
Төлөв төвшин харагдах, ээждээ гурил нухаж өгдөг сайн хүүгийн имиджтэй, Мах импекс, Женко клуб гэсэн тодотголтой манай улсын тав дахь Ерөнхийлөгч. Төрийн тэргүүний суудалд хүртэл заларчихаад буцаж УИХ-ын гишүүн болсон анхны Ерөнхийлөгч асан.
2024 оны УИХ-ын сонгуулиар ОХУ-ын дайн дажин, БНХАУ-ын эдийн засгийн өсөлтийн тухай ярьж, аль талд нь орохоо шийдэх түүхэн сонгууль хэмээн ярьж эрүү мултлах шахсан улстөрч дөө. Түүнд монголын төрд элээж үзээгүй эрх мэдлийн суудал гэж байхгүй.
Төр нүүрсний хулгайн хэргийг илчлэх сонсгол явуултал тэр ирээгүй. Тэгээд хэдхэн сарын дараа АН-аас УИХ-д нэр дэвшсэн. Сонгогчид нь дахин хайраа илчилж, төрд дахин илгээсэн. Нүүрсний хэргийн 17 хулгайчийн нэгээр цоллогдож, АТГ-аар зарлуулж явсан нь ч саяхан л мэт санагдана. Ээ... бас түүнийг оросын гар хөл, "улаан коммунист" гэх нь ч байдаг юм билээ. Юманд учир, суманд гичир гэдэг. Учиртай болоод л зүүсэн нэр биз. Цөс ихтэй хүмүүсийн омогшил Х.Баттулгыг улс төрийн өндөрлөгт хүргэсэн нь бараг л гажихгүй үнэн буй.
Хорвоод ирээд өдийг хүрсэн хугацаа минь УИХ-ын гишүүн Х.Баттулгын төрд тушигдсан хугацаанаас ч бага биз. Өдгөөгөөс өмнө 12 жил УИХ-ын гишүүний бүрэн эрхийг эдэлж, 4 жил тухайн үеийн Зам тээвэр, барилга хот байгуулалтын яамны сайд хийж, эцэст нь бас л Үйлдвэр, хөдөө аж ахуйн сайд, 2017-2021 онд Монгол Улсын Ерөнхийлөгч. Тэгэхээр юу өөрчлөгдсөн бэ? Эх орон ямар болсон бэ? Тэр юу хийсэн бэ? Хүний амьдралын, хэтрүүлвэл хагас зуунд.
Женко гуай танканд дуртай. Тэр бас үлгэрт дуртай.
10 гаруй жилийн өмнө төмөр замын ажлыг танкны үлгэрээрээ зогсоосон суутан. Монгол тулгатны 100 эрхэм гэж байгаа, бас. УИХ-ын гишүүн Н.Номтойбаярын хэлснээр Х.Баттулга "Монголыг золигт гаргасан. Төмөр замыг гацаасных нь горд бид маш их боломжийг алдсан" гэж байгаа. Тэгэхээр бид "зэвүүн, шазруун, аргил баргил" улстөрчтэй байснаараа юу хожсон юм бол. "Монгол ялна" гэсэн хачин романтик уриатай Х.Баттулга бөхийн хөгжилд оруулсан гавьяатай байж болох ч улс төрчийнхөө хувьд гайхам гавьяагүй нэгэн бололтой.
М.Жаргал
