Нийслэлийн Засаг дарга Х.Нямбаатар Эрчим хүчний сайд Б.Чойжилсүрэн төсвийн хөрөнгөөр хувийн хотхон руугаа дулаан татдаг хэмээн өөрийн сошиал хуудсаар мэдэгдсэн. Тодруулбал, “Дүүрэг орон нутаг, нийслэлийн төсвөөр хийгдсэн ажлын араас Эрчим хүчний яам дулааны шугам солино, шинэчилнэ, өргөтгөнө гээд хуулаад сэндийчээд хаячихдаг. Нөхөн сэргээж ажлаа гүйцэд хийж, хүлээлгэн өгөлгүй хаячхаад алга болно. Нийтлэг дүр зураг. 

Сарын өмнө комисс хүлээн авсан явган зам хуулаад хаячихлаа Нямбаатар аа, гээд бүтэн зунжин таны өмнөөс би зодууллаа, Чойжоо сайд аа. 

Нийслэл барьж байгуулна, танай яам араас нь сэндийчиж хаячхаад алга болно. Харин юм л бол хойд хар овоохой гэгчээр нөгөө л Нямбаатар буруутан нь. 

Төсвийн хөрөнгөөр хувийн хотхон руугаа дулаан татдаг, өргөтгөдөг Чойжоо сайд аа, та энэ хядсан ногоон байгууламж, сүйтгэсэн нийтийн эзэмшил, явган замаа хэзээ нөхөн сэргээх вэ?” гэсэн байв.

Тэгвэл УИХ-ын гишүүн Ө.Шижир энэ мэдээлэл үнэн бол Х.Нямбаатар дарга сошиалаар мэдээлэхээс гадна хуулийн байгууллагад гэрчээр мэдүүлэг өгөх хэрэгтэй гэсэн юм.

Тэрбээр, “Төрийн байгууллагуудын уялдаа холбоо гэж байдаггүй юм уу? Сошиалаар гомдоллож байхаар хоорондоо утсаар яриад уулзаад ажилаа яриад уялдуулж болдоггүй юм уу? Нэг засагт хамтдаа сайд байсан хүмүүс байж. Төрийн байгууллагууд хоорондоо хамтран ажиллах санамж гэрээ гээд балай юм байгуулаад байдаг биз дээ? Хотын дарга Х.Нямбаатар,  Чойжилсүрэн сайд  нар хоорондоо гэрээ байгуулаагүй болохоор ийм балай юм ярьцгаагаад байдаг юм уу? Бас төсвийн хөрөнгөөр хувийн хотхондоо дэд бүтэц татаж байгаа тал дээр цахим орчинд бичихээс гадна хуулийн байгууллагад гэрчээр мэдүүлэг өгөх хэрэгтэй” гэв.