"GenZ-ийн нүдээр улстөрчид" буланд тавтай морил. Энэ удаад УИХ-ын гишүүн Н.Номтойбаярын тухай өгүүллээ. GenZ-д түүний тухай эргэцүүлэл байна.

Парламентын гишүүд дундаа л харизмтай, дээр нь нэмээд "ааштай, унтууцсан" мэт улстөрч Н.Номтойбаяр дуулиан шуугиан дундуур явсаар энэ хүрчээ. Одоогийн эрх баригч нам 2016 онд үнэмлэхгүй ялалт байгуулахад манай улсын тэргүүн баячуудын нэг Нямтайширын хүү Хөдөлмөр нийгмийн хамгааллын сайдаар томилогдож байжээ.

Яаж шууд шулуухан, дарданхан замаар явах билээ. Нэг зүйлд холбогдож л таарна даа.

Тухайн үед 13 секундын бичлэг гэх зүйл дуулианы цөм болж, Н.Номтойбаярыг төр нийгмийн зүтгэлтэн Г.Батхүүгийн амь насны хэрэгт холбох оролдлого өрнөж байсан гэдэг. Тэгээд тэр албан тушаалаа урвуулан ашигласан, худал мэдүүлэг гэх зэрэг үндэслэлээр шалгагдаж, УИХ-ын гишүүний бүрэн эрхээсээ хагацаж, тэгэхдээ өөрөө титмээ тайлж, суудлаасаа бууснаар Ерөнхийлөгч У.Хүрэлсүхтэй зам салсан гэгдэнэ.

Цаг хугацаа улирч 2020 онтой золгоход бие даан нэр дэвшигч болохоор гарын үсэг цуглуулчхаад гадаад руу сурахаар арилаад өгсөн юм билээ. Сонирхолтой ч юм шиг, сонгуульд "нэр дэвшье дөө" гээд өчнөөн мянган хүний гарын үсэг цуглуулснаа больчихсон байдаг. Уг нь Ц.Нямдоржтой өрсөлдөгч байх замыг сонгосон гэж байгаа. Тэгээд нэг их өрсөлдсөн ч юмгүй, өрсөлдөх гэсээр байтал жам ёсоороо өвгөн улстөрч суудлаасаа унасан даа. 

Яллагдагч Н.Номтойбаярын цаг явж эхэлсэн нь. Сайд байх үеийнхээ бодлогын шийдвэрийн улмаас 5.5 жилийн хорих ял сонссон Н.Номтойбаяр яаж зүгээр суух вэ. 2021 онд Улсын дээд шүүхэд хандаад “хайнга” гэсэн дүн тавиулсан гэх. Тэгээд л 1 жилийн хорих ялтай, 2 жил нийтийн албан тушаалд томилогдох эрхгүй Н.Номтойбаяр болсон гэж байгаа. Улс төрийн цаг нь эхлэнгүүтээ шахуу л бартаат зам руу хөтөлчихсөн нь сонин. Түүнд "улс төрийн хоригдол" гэх мэт сүржин нэр бий л дээ. Ямар ч гэмгүй хүнийг л яллагдагч болгосон юм байх. 

Өөрийгөө шударга бусын хонгилоор алхсан л гэдэг. 2023 онд бол юун улс төр л гэж байсан. Эцэст нь тэр эвсэл байгуулаад, буцаад Монголын улс төрд ороод ирсэн. Одоо бол өнгөн дээрээ харагдаж буйгаар парламент дахь сөрөг хүчний байр суурийг ганхуулахгүй дүртэй ч цаашид юу болохыг цаг хугацаа л харуулна даа.

Ер нь залуучуудын холбоо молбоонд байж байгаад л улсын сайд болоод байх нь хүн болгоны өмнө асаад байх ногоон гэрэл биш л дээ. Харин Н.Номтойбаярын энэ замыг 2008 онд МАН-ын байр шатахад МАК-аас тэрбум төгрөг хандивласантай холбодог нь бас л сонирхолтой. Тэр бас амьдралдаа хэзээ ч хадгаламжтай байж үзээгүй гэж "Цензургүй яриа"-гаар ярьж байсан ч сүүлдээ хадгалдаг болсон юм уу, 60 сая төгрөгний хадгаламжтай гэж мэдүүлээд сонгуульдсан санагдана. Бага худалчаас их худалч болно доо хө. 

2018 онд Ерөнхий сайд У.Хүрэлсүх МАК бол "Цагаан суварга" тэргүүтэй 36 лиценз эзэмшдэг гэж хэлж байсан байна. Буцааж авна ч гэж байж. Тухайн үед монголын баялагийг хувааж авсан 30 гэр бүлийн нэгт Номтын гэр бүлийг цохон чуулганы индэрээс зарлаж байжээ. Үүний хариуд Н.Номтойбаяр "Улстөрчид эдийн засгийн ачааг үүрдэггүй. Бизнес эрхлэгч, ААН-үүд л үүрдэг. Хууль ёсны дагуу л шийд" гэсэн байр суурьтай байсан. Гэвч үнэн гэвэл төр буцааж аваагүй байгаа л даа. 

Хэдхэн хоногийн өмнө ТЕГ-ын дарга асан Б.Хурцтай мэнд хэлцээд байсныг хүмүүс гайхаад л байх юм. Н.Номтойбаяр чинь тагнуулын цолтой, бэлтгэл офицер гэгдэнэ. Тэгэхээр аргагүй биз дээ. Гэхдээ л жаахан сонин уу. 

Боловсролоо бол гадаадад эзэмшсэн л харагдана. АНУ-ын Индиана мужийн Валпарайсо Их Сургууль, ХБНГУ-ын Берлин хотын Бизнесийн удирдлага, эдийн засгийн их сургууль гээд л. Ингэж сурахгүй гээд ч яах билээ. Ордтой айлын хүү шүү дээ. 

Ерөнхийлөгч У.Хүрэлсүх тухайн үед Н.Номтойбаяр зориулж, салфетка дээр салаа зам зурж өгсөн гэдэг. Одоо тэр зам нийлээ болов уу, яагаа бол? Нийлэх болов уу, яах бол?

М.Жаргал