УИХ-ын чуулганы үеэр УИХ-ын гишүүн О.Алтангэрэл "Оюу толгойн Арбитрын шүүх хурал уржигдар Лондонд эхэлсэн. Ковидын үед 1 их наяд гаруй төгрөгийг нь аваад тараачихсан. Шүүх хурлын явцад цугларсан нотлох баримтаас Монгол Улсад асар их алдагдалтай гэрээ болсон нь тодорхой болчихсон. Сайнхүүгийн Ганбаатар гишүүний 20 жил ярьсан зүйл үнэн болох нь нотлогдчихсон. Шүүхийн шийдвэр Монголын талд ашиггүйгээр гарвал төсөвт яаж нөлөөлөх юм бэ? Энэ талаар тооцоолол байгаа юм уу? Б.Жавхлан сайд санаачлага гаргаад, асуудлыг шийдвэрлэхэд анхаараад явж байсан. Харамсалтай нь, Арбитрын шүүх хуралдаа тулчихлаа. Бидний үед ажлын хэсэг байгуулаад явж байсан арга хэмжээгээ авч явж болохгүй байсан юм уу? "Рио"-гийн санаснаар татварыг төлөх үндэслэлгүй гэсэн шийдвэр гарчихвал цаашдаа төсөвт яаж нөлөөлөх талаарх тооцоолол байна уу? Оюу толгойн мөнгийг монголын банкаар оруулъя гэдэг яриа мартагдсан уу? Ерөөсөө ярихаа больчихсон уу? Бид буугаад өгчихсөн үү" хэмээн асуулаа.

Үүнд Тэргүүн Шадар сайд Н.Учрал "Төлбөрийн тэнцэл 284 сая ам.долларын алдагдалтай байгаа. Засгийн газрын зүгээс үүнийг бууруулах үүднээс О.Алтангэрэл сайд бидний үед Сангийн сайдын ахалж байсан экспортыг нэмэгдүүлэх ажлын хэсэг бол ажиллаж байгаа" гэдгийг хариултдаа дурдлаа. 

Харин Сангийн сайд Б.Жавхлан "Оюу толгойн хувьд манай төлбөрийн тэнцлийн мөнгөний урсгал дээр хангалттай орж ирдэггүй юм аа. 2017 оны үед нэг удаа бүх мөнгөн урсгалыг монголын банкуудаар явуулъя гэдэг заалттай тогтоол орсон боловч УИХ дээр дэмжигдээгүй. Түүнээс хойш тэр хэвээрээ байгаа. Бүх борлуулалтын орлого нь монголын банкуудаар явдаг бол төлбөрийн тэнцэл дээр хангалттай бидэнд хэрэгтэй юм орж ирнэ. Харамсалтай нь тэгж явахгүй байгаа. 1 их наяд 57 тэрбум төгрөгийн татварын өр орж ирээд зарцуулагдсан. Арбитрын шүүх дөхчихлөө. Мэдээж бид муу сценариар бас бодож байх хэрэгтэй. Хэрвээ шийдвэр нөгөө талд гарвал бид буцааж төлөх ёстой. Ийм л эрсдэл ирнэ" гэлээ.

Д.Гэгээ