"GenZ-ийн нүдээр улстөрчид" буланд тавтай морил. Энэ удаад УИХ-ын гишүүн Э.Болормаагийн тухай өгүүллээ. GenZ-д түүний тухай эргэцүүлэл байна.

Ерөнхий сайд асан Л.Оюун-Эрдэнийн "дуудлага"-аар зөвлөх нь болж, Шинэ сэргэлтийн бодлогын хар зургийг зуралцаж байсан ч тэр түмэнд танигдаагүй, хөшигний ард байлаа. Харин нэг л өдөр Монголын анхны эмэгтэй Засаг дарга болох хувь тохиол түүнийг тоссон юм.

Улстөрчийн ажлын албаны хүн биш, зөвлөх биш, хувь улстөрч байх зам нь "засагдчихсан" хүн. Нэр нь Э.Болормаа билээ. Баруунш зорчиж ирээд Монголын улс төрийн халуун цэгт чөдөр дөнгөгүй яваад хүрчихсэн нэгэн. Ховд аймгийн Засаг даргаар МАН-ын дэмжлэгийг саадгүй авч, 2021 онд алс хөдөөг зорьсон нь "удахгүй улам дээшээ гарахын цондон", хожмын нэгэн үйл явдлын зураглал байлаа даа. 

УИХ-ын гишүүн Э.Болормаа төрийн тооноор хөрөнгөтэй бол хөрөнгөтэй, артай бол артай байж л орж ирсэн юм. Анхнаасаа хувийн сургуульд сурч, залгуулаад дэлхийд хүндтэй хоёр ч сургуулийг төгсөнө гэдэг баргийн хүний давдаг даваа ч биш л дээ. Тэгэхээр Дэлхийн банк, НҮБ-ын Ногоон Уур Амьсгалын Сан, Азийн дэд бүтцийн хөрөнгө оруулалтын банканд ажиллаж байсан туршлага нь Монголын парламентад ховорхон CV.

Гэтэл... Манай улс төр ямар ч боловсролтой хүнийг "зүүлэг" мэт болгож чадах юм. Өнөөх Ховдод анх очихдоо том том ажил яриад байсан хүн сүүлдээ "Болзооны апп" яриад болохоо байсан. Одоо хэрэгтэн болчих гээд л, ямар хэргийн буруутан болох гээд байгаагаа ч "ойлгохгүй" л давхиж явна. Гадаадын сургуульд магистр хамгаалахдаа гацаагүй ухаан, төрийн түшээ болчихсон чинь юу ч ойлгохоо байчихаж байгаа юм.

Ховдын иргэдээс оноо авах аргаа сайн сурсан болохоор тэдний талд зогсохоо мартахгүй. Халзан Бүргэтэй, Нарансэвстэй зэрэг асуудалд иргэдийн талд байр сууриа илэрхийлдэг нь нэг хэсэг сайшаал хүртээд амжсан. Уг гарвал нь тэнд болохоор намын хороог нь хүртэл удирдаж байгаа лут хүн ээ. Угтаа боловсролтой, туршлагатайг нь бодвол Э.Болормаа сайн улстөрч болмоор, атал босож ирээд байгаа зарим шуугианаас харвал гавихгүй ч юм шиг.

Эцэст нь Монголын улс төр хэт гажсан юм уу, эрх мэдэлд мэдлэг хүртэл сохроод байна уу?

М.Жаргал