"GenZ-ийн нүдээр улстөрчид" буланд тавтай морил. Энэ удаад УИХ-ын гишүүн О.Батнайрамдалын тухай өгүүллээ. GenZ-д түүний тухай эргэцүүлэл байна.

Монгол орны баруун хязгаар болох Ховд аймгаас Харвард хүртэл явж чадсан О.Батнайрамдал түүгээрээ, түүхээрээ ном хүртэл гаргасан нэгэн. Энэ ч яах вэ, бахархах зүйл мөн. Гэхдээ Харвардын дипломтой хариугүй поп улстөрч болсон нь дэгс бус. 

Өөрийгөө өнгөрсөн 2024 оны сонгуулиар "Эгэл бор хүү" хэмээн тодорхойлсон тэрбээр эгэлгүй ХОМ мэдүүлж алмайруулсан нь ч саяхан. Түүний өөрийн орлого нэг жилийн дотор 330 гаруй сая төгрөгөөр нэмэгдсэн нь бас л аатай сонсогдож байна. Ёстой л үүлэнд нисэж, усанд шумбаж мөрөөдөхөд хангалттай хүрэлцэхээр хөрөнгөтэй болж байгаа юм аа даа. 

МАН-ын Нарийн бичгийн дарга, Уул уурхай, хүнд үйлдвэрийн дэд сайд, Монгол Улсын Засгийн газрын Хэрэг эрхлэх газрын ахлах зөвлөхөөр ажиллаж байсан УИХ-ын гишүүн О.Батнайрамдал "Алсын хараа-2050"-ийг гаргахад оролцсоноороо ихэд бахархаж явдаг гэнэ лээ. Товчхоноор бол гадаадад банкир хийж байгаад эх орондоо ирж, Эрдэнэс Тавантолгойд ажилласан түүнээсээ дамжаад улс төрд хөл тавьсан гэх СV-тэй. Ер нь гадаадын нэртэй их сургууль төгссөн байлаа гээд сайн улстөрч болдоггүйн тод жишээ бол тэр.

О.Батнайрамдал фэйсбүүк бүүст хийж, өөрийгөө спонсорлох маш дуртай. 2024 оны 6 сарын 12-ноос 2025 оны 9 сарын 1-нийг хүртэлх хугацаанд 26 постдоо төлбөр төлж, Boost хийлгэхэд 2000-4673 ам доллар буюу 7.1-16.8 сая төгрөг зарцуулсан (graph.mn) гэдэг нь хэр "эго"-той болохыг нь харуулж байна гэвэл гүтгэсэн болох уу.

Сүүлийн үед "эгэл бор хүү" Оюутолгойн асуудлыг сөхөх боллоо. Уул уурхайн дэд сайд байсан хүн гэхэд арай л хожуу дуугараад байх шиг. Гэнэт ухаан орж, улангасан дайрдаг ах нарынхаа популизмыг сайн суржээ дээ. 100 хоног үлдчихээд байна л гэнэ. Эртхэн дуугарсан бол үнэхээр санаа зовж байна гэж үнэмшихээр л байлаа. Бүүст хийхгүй байсан ч иргэдийн дунд бүүм хийхээр асуудалд юунд тэгж мөнгө зарсан юм бол доо.

Асуудалд дөрөөлж улс төр хийх арга барил нь юм уу. Монголын улс төрд үнэндээ "гэнэт сэрж сэхээрэх" шинэков биш шүү дээ. 

УИХ-ын гишүүн О.Батнайрамдалыг залуу хүн, залуу улстөрч шинийг хийх их замын эхлэлд байгаа гэж хармаар боловч залхаг архаг хулгайчдын арга барилыг өөриймшүүлсэн мэт харагдаад нэг л болж өгдөггүй. Алсын хараа 2050-ийг ярихад аяндаа санаанд ордог "том зургаар нь харах" юм бол О.Батнайрамдал өнөөдрийг хүртэл, асуудлыг даамжиртал тэгэхээр юу хийж явсан хүн бэ? 

М.Гал