Монгол Улсын 2026 оны төсвийн төслийн хэлэлцүүлгийг цахимаар зохион байгуулж, Сангийн яамны цахим хуудас, Emongolia, 11-11 төв, яамдын цахим хуудсаар болон “Төсвийн хөрөнгө оруулалтын удирдлагын цахим систем”-ээр 2025 оны 08 дугаар сарын 01-ний өдрөөс 08 дугаар сарын 14-ний өдрүүдэд санал авсан билээ. Уг санал асуулга, хэлэлцүүлгийн үр дүнд дараах төслүүдийг шинээр эхлүүлэхгүй, хойшлуулах зарчмыг баримталсан байна. Үүнд
- Соёлын төвийн барилга
- Баг, хороо, сум, дүүрэг, аймгийн тамгын газрын барилга
- Сум, аймгийн төвийн доторх авто зам
- Тусгай чиг үүргийн байгууллагуудаас бусад чиглэлийн албан конторын барилга
- Зуслан, амралт цогцолбор
- Ахмад, залуучууд, хүүхдийн хөгжлийн төв
- Кино, театрын барилга
- Үр ашиг, ач холбогдолгүй бусад төслүүд
Дээрх зарчмын хүрээнд улсын төсвийн хөрөнгө оруулалтаар шинээр хэрэгжүүлэх төслүүдийг боловсрол, эрүүл мэндийн хүртээмжийг нэмэгдүүлэх, эрчим хүчний шинэ эх үүсвэр бий болгох, төрийн үйлчилгээг цахимжуулах, онцгой байдлын чадавхыг бэхжүүлэхэд түлхүү чиглүүлсэн бөгөөд мөн байгаль орчин, хүнсний аюулгүй байдал, шинжлэх ухаан, батлан хамгаалах зэрэг бусад салбарт шаардлагатай санхүүжилтийг шийдвэрлэхээр төсвийн төсөлд тусгажээ.
Ташрамд, Хүүхэд хамгааллын тухай хууль 2024 онд шинэчлэн батлагдсантай холбогдуулан Нийгмийн халамжийн тухай хуулийн 19 .2. “Хүүхэд асрах хувилбарт үйлчилгээ үзүүлж байгаа гэр бүл, хуулийн этгээдэд олгох хувьсах болон үйлчилгээний зардлыг нийгмийн халамжийн сангаас санхүүжүүлнэ” гэж заасны дагуу нийт 16 хүүхдийн асрамж, халамжийн төвд амьдарч байгаа 550 хүүхдэд хувцас, эм, хоолны зардлыг баталсан нормативын дагуу олгох 3.4 тэрбум төгрөг нэмж тусгажээ.
