Хууль зүй, дотоод хэргийн сайд, УИХ-ын гишүүн асан Ц.Нямдорж МАН-ын Бага хурлын VIII хуралдаанд үг хэлжээ.

Тэрбээр, "Хүн амины хэрэгтэй холбоотой мэдээлэл нийгэмд очсонд маш их эмзэглэж буйгаа илэрхийлээд “Нэг намаас нэр дэвшиж УИХ-д сонгогдсон, нэг намын гишүүд чуулганы индэр дээрээс, хэвлэлийн хурал хийх замаар бие бие рүүгээ ил цагаан дайрч давшлах, биенээ харлуулах ажиллагааг өөрсдөө хийж байна.

30-аад жил халуун тогоонд нь байсан мань мэт үнэхээр эмзэглэж байна. Очиж очиж хүн амины хэрэгт хамаатуулж, хамт байгаа нөхдөө гүтгэж, энэ намыг, намын хамт олныг алуурчин болгох юм хийгээд байхаар байж суух газар олдохгүй байна шүү. Яригдаад байгаа асуудлын тухайд тухайн Германы иргэншилтэй хятад хүн 2025 оны хоёрдугаар сарын 11-нд Өмнөговьд очиж компанийнхаа ажилтай танилцчихаад буудалд амарсан, өглөө менежер нь ороход нас барчихсан байсан юм билээ.

ЦЕГ болон Өмнөговийн цагдаагаас есөн хүний бүрэлдэхүүнтэйгээр шалгалт хийхэд задлан шинжилгээний дүгнэлтээр “Сахарын өвчинтэй, зүрх судасны архаг өвчинтэй, зүрх нь зогсож нас барсан. Химийн болон биологийн хорт бодис, согтууруулах ундааны төрлийн зүйл биеэс нь илрээгүй” гэдэг дүгнэлт гарсан. Эхнэр нь цогцсыг нь чандарлаад авч явах хүсэлтийг Цагдаагийн байгууллагад гаргасныг хүсэлтээр нь болгосон юм билээ. Гэтэл “нухчихсан” гэдэг үг хэрэглэж болж байгаа юм уу, дэндүү ноцтой асуудал шүү. Би хүн хэлмэгдүүлэхийг ер бусаар үзэн яддаг хүн. Энэ миний хуульчийн үзэл бодол.

Тэр тусмаа Хуулийн сайд хийж байсан хүн мэдэгдэл хийгээд нөхдөө алуурчнаар дуудаж болж байгаа юм уу. Нам доторх нөхцөл байдал ийм болчихсон үед ийм хачин зүйл хийж яваад харамсаж байна. Ш.Раднаасэд мөн л “Д.Амарбаясгалан биднийг нүүрсчнээр зарласан” гэж ярина лээ. Д.Амарбаясгалан тэгж зарлаагүй шүү дээ. Би тэр үед ажлаа өгчихсөн байсан. Гэнэт л нүүрсний хулгайчидтай тэмцэнэ гээд л АТГ-ынхан хоёр гурван хоногийн дараа гарч ирээд дэд дарга, нэг хэлтсийн дарга, мөрдөгч сууж байгаад манай намын харьяалалтай арав гаруй гишүүнийг зарласан.

Тэрний дараа жагсаал цуглаан болоод тэр нэрсийг дахиад зарласан шүү дээ. Тухайн үед би санаа зовоод Ш.Раднаасэд рүү ярьж л байсан. Д.Амарбаясгалан зарлаагүй шд. Яагаад ийм гүтгэлэг тарааж, ийм хачин зүйл хийгээд байна вэ та нар. Ингэж намыг, намаар дамжуулж төрийг гутаах ямар шаардлага байсан юм, арай дэндэж байна. Би худлаа хэлж үзээгүй хүн. Би үүнд чинь эгдүүцэж байна. Одоо Д.Амарбаясгалан гэдэг хүн хүн алах ажлыг зохион байгуулсан юм бол шоронд явах ёстой. Үгүй бол гүтгэсэн хүн хариуцлагаа хүлээх ёстой” хэмээн ширүүхэн загнажээ.