Хэвлэлээр гүтгэж байгаад огцруулах асуудлыг хөнддөг болсон. Энэ бол дарамт, өнөөдөр ч олон гишүүдийг олон шалтгаанаар дарамталж байна гэдгийг УИХ-ын дарга Д.Амарбаясгалан мэдэгдлээ.

Ерөнхий сайд Г.Занданшатарыг огцруулах асуудлыг Төрийн байгуулалтын байнгын хорооны хуралдаанаар хэлэлцэж байгаа энэ цаг үед нүүрсний гэрээнүүдийг нууцад авч байгаад “Нүүрсний хулгайч” мэтээр нийгэмд ойлгуулах замаар гүжирдэн гүтгэж хүний нэр төр, алдар хүндийг гутааж байгаа тухайд УИХ-ын дарга Д.Амарбаясгалан тайлбар хийлээ.

Тэрбээр “Олон жилийн туршид нууцад дарагдаад ҮАБЗ-ийн зөвлөмжөөр гэрээ хийх эрхийг олгуулаад олон их наяд төгрөгийн нүүрсний гэрээтэй холбоотой асуудлууд эдгээр өдрүүдэд яригдаж байгаад талархаж байна. 2022 оны Нүүрсний сонсголын асуудал яг үүнээс үүдэж эхэлж байсан.

Харамсалтай нь, эдгээр оффтейк гэрээнүүдийг бүгдийг нь нуугаад өнгөн дээр нь өөр хүмүүсийг “Нүүрсний хулгайч” гэж зарлаж нийгэмд, олон нийтийн мэдээллийн хэрэгслээр гүжирдэж гүтгэсэн. Тэрний хамгийн том хохирогч нь миний бие өөрөө. Нэг хүрз нүүрс олборлоогүй байхад нүүрсний хулгай хийсэн мэтээр олон нийтэд ойлгуулсан. Өнөөдөр харин оффтейк гэрээнүүд яаж хийгдэж, юу хийж, түүнийг нь хэн хариуцаж байсан бэ гэдэг нь цаг хугацаатайгаа гарч ирж байгаад баяртай байна.

Эдгээр оффтейк гэрээнүүд бүгд 2021.06.23-ны өдрөөс өмнө хийгдсэн. Би ЗГХЭГ-ын даргаар 2022 оны есдүгээр сараас эхэлж ажилласан. Тэр үеэс эдгээр эмх замбараагүй болсон байсан гэрээг цэгцлэх, Биржийн тухай хуулийг хэрэгжүүлэх чиг үүрэг дээр Ч.Хүрэлбаатар сайд, Ж.Ганбаатар сайд нарын хамтаар ажиллаж байсан. Олон хүний эрх ашиг хөндөгдсөний улмаас өөрийг маань нүүрсчин болгож зарлах ажил хийгдэж байсан гэдгийг хариуцлагатайгаар хэлье” гэлээ.