УИХ-ын гишүүн Ч.Лодойсамбуу өөрийн уахим хуудсаар бухимдлаа илэрхийлжээ.

Тэрбээр, “Ирэх долоо хоногийн тов дарааллаас Ерөнхий сайдыг огцруулах асуудал алга болчихож. Уг нь Даргын зөвлөл хуралдаж ирэх долоо хоногт Их хурлаар хэлэлцэх асуудлынхаа тов дарааллыг тогтдог хуультай. Гэвч хурал болсонгүй. Цахимаар ч хуралдсангүй.

Тэгээд Тамгын газраас сая нийтлэсэн тов дараалалд Баасан гаригт завсарласан ТББХ-ны хурал ч алга. Ерөнхий сайдыг огцруулах асуудал байхгүй. Харин Л.Оюун-Эрдэнийн хянан шалгах түр хороо гэх мэт нөгөө талын улс төрийн акциудыг битүү өржээ. Эдний ингэж увайгүй, дур зоргоороо авирладаг нь л эгдүү хүргээд байдаг юм!

Энэ Монгол ардын намын бага хурал биш Монгол Улсын Их Хурал юмсан. Яадаг ч бай Зөвлөл хуралдаж шийдвэр гаргах ёстой бол түүгээрээ л явах ёстой! Хэлэлцээд эхэлсэн асуудал, хэрүүл тэмцлээ хурдан дуусгаж төр засаг нь ажлаа хиймээр байна аа!” гэсэн байна.