Цэцийг цэгцлэхгүй бол горьгүй нь. Нийтлэлч Р.Эмүжин энэ талаар сошиал хуудсандаа маш тодорхой бичсэн байна. Үнэхээр ч түүний онож хэлсэнчлэн “Г.Баясгалан архиа бага уугаад ажлаа хийнэ үү дээ” гэдэг үг үнэн юм. Үндсэн хуулийг манах учиртай Цэцийн байранд шал согтуу гуйвж дайван, агсам согтуу тавьж буй бичлэг нь цацагдсан Г.Баясгалан одоо ч энэ зангаа тавихгүй байгаа бололтой. Арга ч үгүй биз. Ийм хэмжээний ёс зүйн доголдол гаргачихаад байхад нь огцруулаад орны хүнийг нь томилох байтал дэвшүүлээд Цэцийн дарга болгочихсон учраас тэр одоо яавал яаг гээд явж байгаа бололтой.

Г.Баясгалан Цэцийн даргаар томилогдсоноос хойш Үндсэн хуулиа хамгаалах бус, өөрийнхөө арьсыг л хамгаалахад хамаг хүчээ хаяж буй бололтой юм. Цэцийн дарга болсон даруйдаа л Цэцийн байран дахь дотоод хяналтын камеруудыг авч хаяулсан гэх мэдээлэл байдаг юм байна. Энэ үнэн бол энэ хүн яг юуг нууж хаах гээд байгаа юм бол оо? Тэгвэл энэ асуултад Р.Эмүжин нийтлэлч маш тодорхой хариулт өгчихсөн юм шиг санагдлаа.

Тэрбээр “Монголчуудын төлсөн татварын мөнгөнөөс сар бүр 6.0 сая шахам төгрөг цалин гээд аваад хэвтэж байгаагаа бодсон ч, хуулийн дээр гишгэж хурлын тахил болчихоод байгаа даварсан гишүүдийн далай их булхайг бодсон ч Баясгалан та одоо ажлаа хийхгүй юм уу? Эсвэл томилогдсон хугацаа чинь дуусчихсан болохоор яасан ч яахав болсон уу? Гүйх нохойд гүйхгүй нохой саад гэж үгтэй шүү. Ажлын байрандаа архи дарс болдог, уух дуртай хүн даруй бусдын шантаажинд автах нь тодорхой. Согтуу бичлэгийг чинь дэлгэлээ гэхэд л хуулийн зөрчлүүдийг сохор юм шиг илээд өнгөрөөнө биз дээ” гэж бичжээ. Үнэхээр энэ хардлага үнэний маш өндөр хувьтай байх.

УИХ-ын 10 гаруй гишүүний Үндсэн хууль зөрчсөн талаарх гомдол Цэцэд ирсэн ч Г.Баясгалан даргын шүүгээд хав дарагдаад удаж байгаа гэх юм билээ. Угтаа бол УИХ-ын гишүүний халдашгүй бүрэн эрхээр хаацайлж гэмт үйлдлээ дарах гэсэн оролдлогыг тас цохиж, Үндсэн хуулиа мөрдүүлэх үүрэг нь Цэцийнх.

Гэвч Цэцийн дарга Г.Баясгалан УИХ-ын гишүүдэд хяналт тавих ёстой атлаа хийхгүй, улс төрийн ашиг хонжоо хайгаад явна уу гэх хардлага байна. Үгүй гээд мэлзэх эрх ч энэ хүнд алга. Улсын дээд шүүхээс ял сонсчихсон хүн өнөөдөр УИХ-ын гишүүний эрхээ эдлээд хууль баталж явааг өөрөөр тайлбарлах нь утгагүй. Цэц дээр ийм л дампуу байдал ноёлоод байгаагийн цаад шалтгаан нь Г.Баясгалан даргын эс үйлдэлтэй холбоотой юм.

10 гаруй гишүүн гэхээр парламентын бараг аравны нэг нь Үндсэн хууль зөрчсөн байж болзошгүй гомдол Цэц дээр овоорчихоод байхад Г.Баясгалан дарга архи дарс эргүүлсэн шигээ арын өрөөндөө суугаад байж болох уу. Аль эсвэл бүрэн эрхийн хугацаа нь зургаадугаар сард дуусчихсан болохоор огт хөдөлж өгөхгүй байна уу. Ямар боловч Үндсэн хуулиа бид өөр хүнээр мануулах ёстой болсон нь л үнэн юмдаг. Г.Баясгалан даргыг Цэцийн хаалганд машинаа тулгаж тавиулж байгаад туслах, жолоочоороо өргүүлж суугаад харьдаг гэх явган яриа байдаг юм байна. Баталж хэлж мэдэхгүй ч, байрандаа бол уудаг, уугаад бичлэг нь цацагдсан гэдгийг Та бид бүгд л харсан. Үнэхээр тэгтлээ ууж идэх дуртай юм бол Үндсэн хуулийн Цэцэд суудал бөглөж суухын оронд тэтгэвртээ суугаад тааваараа хүртэх нь дээр биш гэж үү?

А.Болдбаатар