2019 оноос өмнө Үндсэн хуулийн Дөчин гуравдугаар зүйлийн 3-т “Улсын Их Хурлын гишүүдийн дөрөвний нэгээс доошгүй нь Засгийн газрыг огцруулах тухай саналыг албан ёсоор тавьбал Улсын Их Хурал хэлэлцэн шийдвэрлэнэ” гэсэн заалтын дагуу 2014 онд Ерөнхий сайд Н.Алтанхуягийг огцруулах эсэх асуудлыг, 2017 онд Ерөнхий сайд Ж.Эрдэнэбатыг огцруулах эсэх асуудлыг хэлэлцэхдээ Байнгын хорооны санал, дүгнэлтээр нэгдсэн хуралдаанд санал хураалтын томьёоллыг оруулж, шийдвэрлэж байсан.
Харин 2019 оны Монгол Улсын Үндсэн хуульд оруулсан нэмэлт, өөрчлөлтөөр Дөчин гуравдугаар зүйлийн 1 дэх хэсгийг “Улсын Их Хурлын гишүүдийн дөрөвний нэгээс доошгүй нь Ерөнхий сайдыг огцруулах саналыг албан ёсоор тавибал Улсын Их Хурал гурав хоногийн дараа хэлэлцэж эхлэн арав хоногийн дотор шийдвэрлэнэ.
Улсын Их Хурлын нийт гишүүний олонхи уг саналыг дэмжсэн бол Ерөнхий сайдыг огцруулах тухай Улсын Их Хурлын тогтоол баталсанд тооцож, шинэ Ерөнхий сайдыг гуч хоногийн дотор томилно” гэж Улсын Их Хурлын нийт гишүүний олонхи “уг саналыг дэмжсэн” бол гэж заасан буюу гишүүдийн гаргасан огцруулах саналаар нэгдсэн хуралдаан санал хураалт явуулахаар Үндсэн хуулийн зохицуулалт өөрчлөгдсөн юм.
Иймд одоогийн Ерөнхий сайдыг огцруулах эсэх саналыг анх өргөн барьсан гишүүдийн саналын дагуу огцруулах саналыг дэмжье гэсэн томьёоллоор нэгдсэн хуралдаанд санал хураалт явуулах нь Үндсэн хуульд нийцнэ.
Лавлагаа
| 1992 оны Үндсэн хууль |
2019 оны Монгол Улсын Үндсэн хуульд оруулсан нэмэлт, өөрчлөлт |
| Дөчин гуравдугаар зүйл
1. Засгийн газар бүрэн эрхээ хэрэгжүүлэх боломжгүй гэж үзвэл хугацаа дуусахаас өмнө огцрох тухайгаа Ерөнхий сайд Улсын Их Хуралд өргөн мэдүүлж болно.
2. Ерөнхий сайд, эсхүл Засгийн газрын гишүүдийн тэн хагас нь нэгэн зэрэг огцорвол Засгийн газар бүрэлдэхүүнээрээ огцорно.
3. Улсын Их Хурал Засгийн газрыг огцруулах тухай өөрөө санаачилсан болон Ерөнхийлөгчийн санал, Ерөнхий сайдын мэдэгдлийг хүлээн авснаас хойш арван тав хоногийн дотор Засгийн газрыг огцруулах эсэхийг хэлэлцэн шийдвэрлэнэ.
4. Улсын Их Хурлын гишүүдийн дөрөвний нэгээс доошгүй нь Засгийн газрыг огцруулах тухай саналыг албан ёсоор тавьбал Улсын Их Хурал хэлэлцэн шийдвэрлэнэ. |
Дөчин гуравдугаар зүйл
1. Улсын Их Хурлын гишүүдийн дөрөвний нэгээс доошгүй нь Ерөнхий сайдыг огцруулах саналыг албан ёсоор тавибал Улсын Их Хурал гурав хоногийн дараа хэлэлцэж эхлэн арав хоногийн дотор шийдвэрлэнэ. Улсын Их Хурлын нийт гишүүний олонхи уг саналыг дэмжсэн бол Ерөнхий сайдыг огцруулах тухай Улсын Их Хурлын тогтоол баталсанд тооцож, шинэ Ерөнхий сайдыг гуч хоногийн дотор томилно.
|
Сэтгэгдэл (4)