Өнөөдөр УИХ-ын чуулганы хуралдаанаар Монгол Улсын 2026 оны төсвийн гуравдугаар хэлэлцүүлгийг хийнэ. Иймд 2026 оны төсвийн жилд Нийгмийн эрүүл мэндийн чиглэлд хэдэн төгрөгийг төсөвлөсөн талаарх мэдээллийг хүргэе.
Монгол Улсын 2026 оны нэгдсэн төсвийн:
- Тэнцвэржүүлсэн орлогыг 31.6 их наяд төгрөг,
- Нэгдсэн төсвийн нийт зарлага 32 их наяд 980 тэрбум төгрөг,
- Төсвийн тэнцэл ДНБ-ий 1.3 хувийн алдагдалтай байхаар төлөвлөжээ.
Оновчтой бодлого, төлөвлөлтгүйгээр үр дүн нь тодорхойгүй эрүүл мэндийн хөтөлбөр, арга хэмжээнүүдэд төсөв зарцуулж ирсэн байдлыг өөрчилнө. Халдварт бус өвчнөөс урьдчилан сэргийлэх, хянах чиглэлд Дэлхийн эрүүл мэндийн байгууллагаас зөвлөмж болгосон “Халдварт бус өвчнөөс сэргийлэх, хянах үр ашигтай арга хэмжээнүүд”-ийг баримтлан зөвхөн нотолгоо, судалгаатай үйл ажиллагаанд эрүүл мэндийг дэмжих сан болон бусад нийгмийн эрүүл мэндийн хөтөлбөр, арга хэмжээнд төлөвлөсөн зардлыг зарцуулж, төсвийн үр ашиг, сахилга бат, ил тод байдлыг сайжруулна. Дээрх зорилтыг хэрэгжүүлэхэд нийгмийн эрүүл мэндийн чиглэлээр 2026 оны төсвийн төсөлд нийт 89.4 тэрбум төгрөгийг тусгасан байна.
-Эмнэлгийн тусламж, үйлчилгээний чиглэлээр-
Монгол улсад оношлогдож, эмчлэгдэх боломжгүй өвчин эмгэгийн нэр, төрлийг бууруулах хүрээнд эмчилгээний шинэ арга барил, технологийг нутагшуулж, эмнэлгийн тусламж, үйлчилгээний чадавхыг нэмэгдүүлнэ.
Эмнэлгийн тусламж, үйлчилгээний үр ашиг, үр дүнг нэмэгдүүлэх, тусламж, үйлчилгээний давхардлыг арилгах зорилгоор эмнэлгийн тусламж, үйлчилгээний зохион байгуулалтыг хүн амын эрүүл мэндийн эрэлт хэрэгцээнд нийцүүлж шинэчилнэ. Энэ хүрээнд анхан шатны тусламж, үйлчилгээг иргэнд ойртуулах, амь нас аврах яаралтай тусламжийн тогтолцоог шинэчлэх, нийслэл рүү чиглэсэн эрэлт ба урсгалыг бууруулах зэрэг бодлогын өөрчлөлтийг хэрэгжүүлнэ.
Лаборатори, дүрс оношилгоо, тоног төхөөрөмжийн засвар үйлчилгээ, угаалга, ариутгал, гал тогоо зэрэг дэмжих үйлчилгээг нэгтгэж, нөөцийг үр ашигтай удирдах чиглэлд тодорхой арга хэмжээнүүдийг авч хэрэгжүүлнэ. Зарим дэмжих үйлчилгээг нь төр хувийн хэвшлийн түншлэлээр харилцан үр ашигтай зохион байгуулах нэгдсэн сүлжээнд оруулж, зардлыг бууруулах аж.
Мөн эрүүл мэндийн даатгалын нэхэмжлэлийн хяналтын тогтолцоог цахим болон хиймэл оюун ухаанд суурилж, хөндлөнгийн шинжээч болон иргэдийн үнэлгээнд тулгуурлан үнэлдэг хэлбэрт шилжүүлж, хувь хүний нөлөөллөөс арилгах шинэчлэлийг хэрэгжүүлнэ. Эмнэлгийн тусламж, үйлчилгээний санхүүжилтийн үр ашгийг нэмэгдүүлэхтэй холбогдуулан дээрх арга хэмжээнүүдийг авч хэрэгжүүлэх ба энэ хүрээнд 2026 оны нэгдсэн төсвийн төсөлд нийт 2,350.9 тэрбум төгрөг төлөвлөжээ.
