Эрүүл мэндийн сайд Ж.Чинбүрэн аравдугаар  сард “Энэ жил томуугийн үеэр эмнэлгийн коридорт нэг ч хүүхэд хэвтүүлэхгүй” хэмээн мэдэгдэж байсан. Сар гаруйн өмнө сайдын хийсэн энэ мэдэгдэл тухайн үедээ улс төрийн, өмнөх сайд нараа буруутгасан өнгө аястай уншигдаж байсан ч эмнэлгийн коридороор ор дэлгэхгүй гэдэг үг нь олны талархлыг хүлээж байв.

Гэхдээ эмч, эмнэлгийн ажилтнууд бол салбарын сайдын энэ үгийг олонд таалагдах популизм төдий гэдгийг мэдэрч байсан нь лавтай.

Учир нь, томуугийн дэгдэлтийг хамгийн сайн хянадаг вакцинжуулалтын бодлого дээрээ салбарын яам аль хэдийн алдаа гаргачихсан байсан үе шүү дээ. Авсан 300 мянган тун вакциныг зорилтот бүлэгт бүрэн хамруулж чадаагүй, нэмэлтээр авах байсан 200 мянган тун вакциныг авалгүй орхисон зэрэг нь томуугийн дэгдэлт өндөр байх хөрсийг нь бэлдчихсэн гэсэн үг.

Уг нь “Өвөл болохоор хүйтэн болдог” гэдэгтэй л адил томуу бол жил бүрийн өвөл утаат Улаанбаатарын хүүхдүүдэд ялангуяа өндөр эрсдэл авчирч байдаг. Эрүүл мэндийн салбарынхан, бодлого тодорхойлогчид үүнд жил бүр урьдчилан бэлдэж, хүчин чадал, хүний нөөц, вакцин, ор бүгдийг нь төлөвлөж эрсдэлээс сэргийлдэг. Гэтэл энэ жил урьдчилан сэргийлэх ийм арга хэмжээнүүдээ аваагүй атлаа “Эмнэлгийн коридорт ор дэлгэхгүй” гэдэг Эрүүл мэндийн сайдын үг үнэн хэрэгтээ ус үзээгүй байж гутал тайлж, уул үзээгүй байж хормой шуусан л хэрэг байв. Хагас сарын өмнөөс томуугийн дэгдэлт эрчимжиж, өндөр халуурч, амьсгалын дутагдалд орох эрсдэл ихэсч байна.

Гэсэн ч олны өмнө хийсэн сайдын мэдэгдлийг биелүүлэх гэсэн үү яасан томуу, томуу төст өвчнөөр өвчилсөн “хүндэвтэр” оноштой хүүхдүүдийг эмнэлэгт хэвтүүлэхгүйгээр гэрийн нөхцөлд эмчлүүлэхээр буцааж байна гэсэн гомдол эцэг эхчүүдээс олон ирж байна. Хүндэвтэр хүүхдүүдийг гэрийн нөхцөлд эмчлүүлэхээр буцааснаас болж хүндэрч, амьсгалын замын дутагдалд орох эрсдэл энэ хэрээрээ ихэссэн гэсэн үг юм.

Томуу, томуу төст өвчний үед эмчийн хяналтад яаралтай арга хэмжээ авахгүй бол амьсгалын замын дутагдалд орох эрсдэл маш өндөр байдгийг эрүүл мэндийн салбарынхан гэлтгүй л бүгд мэднэ. Ийм байхад сайдын ПОПУЛИСТ амлалтыг биелүүлэх гэж “хүндэвтэр” оноштой хүүхдүүдийг гэрийн нөхцөлд эмчлүүл гэж буцаах нь мэргэжлийн аюулгүй байдлын стандарт, хүүхдийн амь насыг хамгаалах эрүүл мэндийн салбарт ажиллаж байгаа хэн бүхний дагаж мөрдөх ёстой үндсэн зарчимтай харшлахгүй байна гэж үү?

Эмнэлгийн коридорт ор дэлгэхгүй, хүүхдүүд хэвтүүлэхгүй гэдэг бол уг нь зөв зорилт. Гэхдээ үүнийг зөв төлөвлөлт, зөв хөрөнгө оруулалт, зөв бэлтгэлтэй байж л хийж чадна. Түүнээс бус ийм үгийг хэн нэгний улс төрийн имижийг бүрдүүлэхийн тулд, олон нийтэд таалагдах алга ташилтад зориулж хэлж болохгүй. Бодлогогүй амлалт, тооцоогүй шийдвэрээр хүүхдийн амь нас, эрүүл мэндийг эрсдэлд оруулж БҮР БОЛОХГҮЙ!!! Эмнэлгийн коридортоо ороо дэлгээд ч болов нялхсыг амьсгалын замын дутагдалд оруулахаас сэргийл. Таны үг зүгээр л ПОПУЛИЗМ байсныг бодит байдал хангалттай нотолчихлоо, одоо ороо дэлгэ сайд аа.

 А.Болдбаатар